СӨ Бырабыыталыстыбатын Бэрэссэдээтэлин смолбуйааччы Сергей Местников салайааччылаах оробуочай бөлөх Уус Алдан улууһугар отчуоттуур.
Түмүк улуус киинигэр буолла. Олохтоохтор Бырабыыталыстыба отчуотун истэн баран, ааспыт сыллааҕы үлэни үчүгэйинэн сыаналаатылар.
Сергей Местников бэлиэтээбитинэн, улууска дьон-сэргэ ордук ОДьКХ, уматыгынан хааччыллыы, уот-күөс туһунан боппуруостар ордук элбэхтик бэриллибиттэр. Ону сэргэ, сорох нэһилиэктэргэ социальнай эбийиэктэри тутуу туһунан токкоолоспуттар. Тирээн турар суолталаах боппуруостары ыйыппыттар, ол курдук, кииннэммит ититиигэ холбооһун, хочуолунайдары тутуу уонна өрөмүөннээһин, ону сэргэ муниципальнай суоллары оҥорууга.
Бороҕоҥҥо «Запад-2» диэн улахан механизированнай хочуолунай тутуута салҕанар. Урут манна «Восток-1» тутуллубута.
Майаҕаска оҕолор ааспыт үйэ 50-с сылларыгар тутуллубут хаарбах оскуолаҕа үөрэнэллэр. Билигин саҥа оскуола тутуутун бырайыактыыр-сметнай докумуоннарын оҥороллор. Ону тэҥэ, Өнөргө, Чараҥҥа оскуолалары тутуу боппуруостара сытыытык тураллар. Былаас бэрэстэбиитэллэрэ Өнөргө оскуоланы тутуу бырайыагын «Ыччат уонна оҕо» национальнай бырайыак тэрээһиннэригэр киллэрэргэ үлэ бара турарын быһаардылар.
Тумулга олохтоохтор оскуола тутуутун боппуруоһун сөргүтэри туруорустулар. 2014 сыллаахха кыһа саахалланар туруктаах буолан көтүрүллүбүт. Саҥа эбийиэк бастакы атахтара туруоруллубуттар эрээри, бэдэрээччит буруйунан үлэ тохтообут, дуогабар көтүрүллүбүт.
2025 сыллаахха Хомустаах сэлиэнньэтигэр «Биэттэ-Арго» ХЭУо бурдук ыскылаата, 50 төбө киирэр хотонноро ИП КФХ Охлопков Д.М. Майаҕаска уонна Бээдигэ ИП А.В. Ушницкайга киллэриллибиттэр. Мантан да атын үлэлэр ыытыллыбыттар.
Нэһилиэнньэни кытта көрсүһүүгэ бары ыйытыыларга толору хоруйдар бэрилиннилэр. Ону сэргэ, олохтоохтор биэрбит ыйытыылара түмүк боротокуолга киллэриллэн үлэҕэ ылыллыахтара.
Сиһилии: https://www.sakha.gov.ru/news/30034
СӨ Ил Дарханын уонна Бырабыыталыстыбатын пресс-сулууспата