Бүгүн өрөспүүбүлүкэ уопсастыбаннаһа Ил Түмэн Бэрэссэдээтэлин бастакы солбуйааччы Александр Жирков үбүлүөйдээх 70 сааһын үөрүүлээх быһыыга-майгыга бэлиэтээтэ.
Ил Дархан Айсен Николаев биллиилээх судаарыстыбаннай, бэлитиичэскэй уонна уопсастыбаннай диэйэтэл Александр Жирков бэрэстэбиитэллээх уорган сайдыытыгар кылаатын, дьокутааттыыр кэмигэр сокуону оҥорор былаас атаҕар туруутугар, 90-с сыллар уустуктарын туорааһын кэмигэр, уопсастыба сайдар бары хайысхаларыгар быһаччы кыттыһан, өрөспүүбүлүкэ сайдыытыгар үлэлэспитин тоһоҕолоон эттэ.
«Олох араас хамсааһынын түстүүр Саха сирин аныгы устуоруйата сайдыытын үөһүгэр Александр Николаевич Жирков өрүү инники күөҥҥэ сылдьыбыта уонна сылдьар даҕаны. Кини бэйэтин дьаныарынан Судаарыстыбаннай Мунньах (Ил Түмэн) өрөспүүбүлүкэбит туруктаах буолуутун хааччыйар. Бу уустук историческай кэмҥэ биһиги парламеммыт дойдубут бары норуоттарын сомоҕолоһуутун бөҕөргөтөр соруктаах үлэлиир. Маныаха Александр Николаевич норуот дьокутаатын, сис кэмитиэттэр бэрэссэдээтэллэрин уонна, биллэн турар, бэһис ыҥырыылаах Судаарыстыбаннай Мунньах (Ил Түмэн) бэрэссэдээтэлин быһыытынан дириҥ ис хоһоонноох үлэни олохтоохтук тэрийэн ыыппыта. Александр Жирков Саха сирин улуу уолаттарыгар сыһыаннаах историческай кырдьыгы төннөрүүгэ уонна Максим Кирович Аммосов үтүө аатын харыстааһыҥҥа Казахстаҥҥа уонна Кыргызстаҥҥа ыыппыт үлэтэ, кылаата бэлиэтэнэр. Билигин улахан суолталаах үлэ бу дойдулары кытта доҕордуу сыһыаны бөҕөргөтөргө туһуланар. Александр Николаевич өрөспүүбүлүкэҕэ үөрэхтээһиҥҥэ, наукаҕа, култуураҕа саха норуотун ураты үгэстэрин харыстааһын курдук улахан суолталаах боппуруостары быһаарыы бириинсиптэрин тутуһар. Кини норуоппут духуобунай сыаннастарын харыстааһыҥҥа уонна тарҕатыыга оруолун бэлиэтиэхпин баҕарабын. Ордук бэлиэтиэхпин баҕарабын кини Олоҥхону героическай эпос курдук билинэллэрин, уус-уран тылынан айымньы саамай үрдүк чыпчаалынан — аан дойду култууратын шедеврынан буоларын ситиспитэ. Олоҥхо Ыһыаҕа билигин кини тэрийиитинэн өрөспүүбүлүкэ биир суолталаах тэрээһининэн буолла. Бу Александр Николаевич омукпут историческай нэһилиэстибэтигэр ытыктабылын бэлиэтэ, — диэн бэлиэтээтэ Ил Дархан Айсен Николаев эҕэрдэ тылыгар. Айсен Николаев үбүлээр дьиэ кэргэнигэр — Людмила Петровнаҕа уонна оҕолоругар Александр Николаевичка сылаас тапталларын, өйөбүллэрин иһин истиҥник махтанна.
Доҕордоһууну бөҕөргөтүүгэ, норуоттар икки ардыларыгар бииргэ үлэлэһиини, өйдөһүүнү сайыннарыыга сүҥкэн кылаатын, өр сылларга сыралаах уонна тахсыылаах үлэтин иһин Ил Дархан Айсен Николаев Ил Түмэн Бэрэссэдээтэлин бастакы солбуйааччы Александр Жирковка «Норуоттар икки ардыларынааҕы эйэни уонна доҕордоһууну бөҕөргөтүү иһин» СӨ бочуоттаах бэлиэтин туттарда.
Сиһилии: https://www.sakha.gov.ru/news/30038 сигэнэ ааҕыҥ.