XXIX Петербурдааҕы норуоттар икки ардыларынааҕы экэнэмиичэскэй пуорум (ПМЭФ) чэрчитинэн ПСБ баан, «Токеон» платформа уонна «Саха Өрөспүүбүлүкэтин Сайдыытын корпорацията» АО сыыппара бырааптарын уонна сыыппара харчытын эйгэтигэр стратегическай бииргэ үлэлээһин туһунан үс өрүттээх сөбүлэҥҥэ илии баттаатылар.
Докумуоҥҥа ПСБ бэрэссэдээтэлин солбуйааччы Ольга Мямлина, «Токеон» генеральнай дириэктэрэ Игорь Егоркин уонна Саха Өрөспүүбүлүкэтин Сайдыытын корпорациятын генеральнай дириэктэрэ Василий Ефимов илии баттатылар.
Өрүттэр аныгы үбүнэн өҥөлөрү бииргэ оҥорорго уонна Саха сирин экэниэмикэтигэр саҥа блокчейн-технологиялары киллэрэргэ сөбүлэстилэр. Бииргэ үлэлээһин сүрүн хайысхаларынан креативнай индустрия бырайыактарын олоххо киллэрии, сыыппара экэниэмикэтигэр саҥа таһаарааччылары (эмитент) уонна инвестордары тардыы буолар.
Саха сирин Сайдыытын корпорацията сыыппара быраабын үнүстүрүмүөннэрин экэниэмикэ дьиҥнээх салаатыгар киллэриигэ ситиһиилээх практическай уопуттаах. Дьиҥинэн, кинилэр Уһук Илин эрэгийиэҥҥэ сыыппара үбүн активтарын (ЦФА) туһаныыга бастакынан буолбуттара уонна дойду креативнай экэниэмикэтигэр хапытаал тардыытыгар саҥа суолу арыйбыттара. Маннык үлэ көдьүүстээҕэ олоххо бигэргэтилиннэ: бу ньыма көмөтүнэн эрэгийиэннээҕи «Мои таежные каникулы» уонна «Новый Богатырь» киинэ бырайыактарын тус сыаллаах үбүлээһин хааччыллыбыта.
«Сыыппара бырааптарын ырыынагын сайдыыта саҥа таһымҥа таҕыста — билигин технологиялар экэниэмикэ дьиҥнээх салаатыгар көдьүүстээхтик үлэлииллэр. ПСБ уонна Саха сирин Сайдыытын корпорацията «Токеон» өйөбүлүнэн бииргэ үлэлээһиннэрэ биһиги үпкэ-харчыга компетенциябытын уонна эрэгийиэн креативнай индустрияҕа бырайыактары токенизациялааһыҥҥа уопутун түмэргэ кыах биэриэ. Биһиги үлэбит Арассыыйа субъекттарыгар инвестицияны тардар уонна эмитентэр, инвестордар киэҥ араҥаларыгар саҥа кыахтары арыйар судургу сыыппара эйгэтин тэрийиигэ туһаайыллар», – диэн бэлиэтээтэ Ольга Мямлина.
«Бу сөбүлэҥҥэ илии баттааһын – «Токеон» инфраструктураҕа быһаарыыларын кэҥэтиигэ дьоһун хардыы буолар. Биһиги Саха сирэ сыыппараҕа көһүүгэ үрдүк кыахтааҕын көрөбүт уонна бэйэбит блокчейн-платформабытын биэрэргэ бэлэммит. Биһиги сорукпут – эрэгийиэннээҕи биисинэскэ сыыппара бырааптарын таһаарыыны судургу уонна өйдөнүмтүө оҥоруу, ону кытта инвестордарга толору дьэҥкэ (прозрачнай) буолууну хааччыйыы», – диэн иһитиннэрдэ Игорь Егоркин.
«Киинэ индустриятыгар саҥа үбүнэн үнүстүрүмүөннэри туһаныы өрөспүүбүлүкэ экэниэмикэтигэр улахан суолталаах хардыы буолар. Киинэ устуутугар ЦФА-ны кытта ситиһиилээхтик үлэлээбит уопуттуттан көрдөххө, маннык быһаарыылар олус наадалаахтар. ПСБ-ны уонна «Токеон» платформаны кытта стратегическай бииргэ үлэлээһин сыыппара бырааптарын уонна сыыппара харчытын эйгэтигэр саҥа бырайыактары олоххо киллэрэргэ акылаат буолар. Бу биһиэхэ инвестицияны өссө көдьүүстээхтик тардарга, эмитентэр ахсааннарын кэҥэтэргэ уонна Саха сирин технологическай кыаҕын сайыннарарга көмөлөһүөҕэ», – диэн докумуоҥҥа илии баттааһыны быһаарда Василий Ефимов.