Арассыыйаҕа, ол иһигэр Саха сиригэр, кибер-түөкүттэр дьону албынныыр саҥаттан саҥа ньымалары тобулаллар. Бу күннэргэ кинилэр дьиэ кэргэн ипотекатын усулуобуйата уларыйыытын, ону тэҥэ Оҥоһуу өйү туһанан дьону албынныыллар.
Дьиэ кэргэн ипотекатынан албыннааһын
«Известия» хаһыат суруйарын курдук, социальнай ситимнэринэн Арассыыйаҕа дьиэ кэргэн ипотекатын усулуобуйата уларыйбытын туһунан сымыйа сонуннар тарҕанан бардылар. Эспиэрдэр бэлиэтииллэринэн, түөкүттэр бэйэлэрин “риэлтор” эбэтэр “инсайдер” курдук билиһиннэрэн, ипотека бырыһыанын саҥаттан ааҕар буоллулар диэн сураҕы тарҕаталлар.
Ону тэҥэ дьону “эргэ усулуобуйанан кирэдьиити ылан хаалыҥ” диэн ыксыталлар. Дьиэ буларгытыгар көмөлөһүөхпүт диэн баран, тус суруйууга сайаапка хаалларарга көрдөһөллөр. Исписэлиистэр сэрэтэллэринэн, маннык ньыма дьону куттуурга уонна сыыһа туттарга үтүрүйэр. Түөкүттэр дьиэни чэпчэки сыанаҕа атыылыылларын туһунан сымыйа биллэриини таһаарыахтарын, суох дьиэ иһин харчы көрдүөхтэрин сөп. Ону таһынан, дьиэни онлайн-көрдөрөбүт диэн ааттаан, кутталлаах сигэлэри ыыталлар.
Үп министиэристибэтигэр бэлиэтииллэринэн, дьиэ кэргэн ипотекатын бүтэһиктээх усулуобуйалара бигэргэтиллэ иликтэр, ону от ыйын диэки биллэриэхтэрэ. Онон туох баар иһитиннэриини официальнай буоларын бэрэбиэркэлииргэ сүбэлииллэр.
ФСБ “үлэһитэ” уонна “сымыйа” харчы
Оттон телеграм-ханааллар суруйалларынан, түөкүттэр өссө биир саҥа албынныыр ньыманы олоххо киллэрдилэр. Кинилэр дьоҥҥо “баан сыыһа сымыйа харчыны биэрбит” диэн итэҕэтэллэр.
Холобур, Кубань 49 саастаах олохтооҕо аймаҕар дьиэ атыылаһаары баантан элбэх харчыны устубут. Сотору буолаат, төлөпүөнүгэр биэс тыһыынчалаах купюра хаартыскалаах дьикти суругу туппут. Онтон киниэхэ ФСБ “үлэһитэбин” диэн кубулуммут киһи эрийэн, “баантан сымыйа харчыны ылбыккын” диэн куттаабыт. Итэҕэтээри кини Оҥоһуу өй көмөтүнэн оҥоһуллубут “баан үлэһиттэрин” аудио-кэпсэтиилэрин иһитиннэрбит. Ол кэпсэтиигэ кинилэр харчыны уларыппыттарын туһунан кэпсэтэллэр уонна дьахтар тус дааннайдарын ааттыыллар эбит.
Куттаммыт дьахтар түөкүттэр тугу эппиттэрин барытын толорон, 4 мөл. солкуобайдаах бакыаты икки билбэт дьонугар таһааран биэрбит.
Саха сирин олохтоохторо, туох да буолбутун иһин, билбэт дьоҥҥутугар харчыгытын биэримэҥ, тус дааннайгытын этимэҥ. Баантан эбэтэр куттал суох буолуутун уорганнарыттан (ФСБ, ИДьМ) эрийэллэр дии санаатаххытына, тута төлөпүөҥҥүтүн ууруҥ уонна бэйэҕит официальнай нүөмэрдэринэн эрийэн билсиҥ!