“Күҥҥэ биир бакаал кыһыл арыгы хаан сүүрэр тымырдар үлэлэрин тупсарар диэн этиини “арыгыны иһэллэрин сөбүлээччилэр эбэтэр арыгыны оҥорооччулар” толкуйдаабыттар”, — диэн РНА академига Лео Бокерия этэр.
Кини этэринэн, арыгы кыра өлүүтэ хааҥҥа туһалаах. Ол гынан баран, арыгы «кытаанах» буолуо суохтаах уонна хаачыстыбата үчүгэй буолуохтаах. Онуоха үрүҥ винону иһэр ордук. Тоҕо диэтэххэ, үрүҥ вино организмтан түргэнник тахсар.
2014 сыллаахха «арыгыны кыратык иһии доруобуйаҕа үчүгэйдик дьайар» диэн этии эмиэ сымыйа дойҕох буоларын дакаастаабыттар. Чинчийэр бөлөххө 165 институт учуонайдара кыттыбыттар. Боруобалааһыннар, чинчийиилэр кэннэ арыгы аҕыйах да, элбэх да өлүүтэ доруобуйаҕа, бастатан туран, мэйиигэ буортулааҕын быһаарбыттар. Кыратык да итирбит киһи туругар мэйии килиэккэлэригэр кислород тиийбэккэ аччыктыыллар, сорох килиэккэлэр өлөллөр. Ол түмүгэр Альцгеймер ыарыытын чугаһатыахха сөп.