Дьокуускайга буолбут «Грани библиотекаря» пуорумҥа Арассыыйа араас дойдутуттан 240 эдэр бибилэтиэкэр кытынна.
Тэрээһин чахчыта да айар уххан дьиҥнээх лабораториятынан буолла, бастакы кэрдиискэ сонун санаалар уонна этиилэр, артыыс маастарыстыбата уонна култуура түгэннэрин сатаан тэрийии таҕыстылар.
«Грани библиотекаря» Арассыыйа бибилиэтиэкэрдэрин XII пуорума» бырайыагы «Бибилэтиэкэ көҕүлүүр киинэ» куорат уопсастыбаннай тэрилтэтэ олоххо киллэрдэ. Онуоха «Дьиэ кэргэн» национальнай бырайыак «Дьиэ кэргэн сыаннастара уонна култуура инфраструктурата» федеральнай бырайыагын чэрчитинэн, «Арассыыйа култууратын пуондата» ООГО биэрбит Гранын туһанна.
Пуорум хара бастакыттан уратытык барда -– үгэс буолбут дакылааттар оннуларыгар испиикэрдэр, салайааччылар «Ситиһии формулата» ТЕД истиилинэн тус устуоруйаларын үллэһиннилэр. Пуорум кыттыылаахтарыгар артыыс маастарыстыбатыгар уонна араатар ускуустубатыгар маастар-кылаастары ыыттылар. Тоҕо диэтэххэ, аныгы бибилэтиэкэр -– кинигэни харыстааччы эрэ буолбатах, кини шоумен, култуура тэрээһиннэрин продюсера уонна режиссера.
Дьокуускай куорат бибилэтиэкэрэ Розалия Ксенофонтова урут суруналыыһынан үлэлээбитэ бибилэтиэкэр үлэтигэр улахан тирэх буолбутун дакаастаата. Благовещенскайтан кэлбит Александра Рихновец 27 сыл бибилэтиэкэни салайбыт уонна куорат 12 бибилэтиэкэтиттэн аҕыһын модельнай бибилэтиэкэлэргэ кубулутан, хорсун санаа уонна креативнайдык салайыы ситиһии төрдө буоларын бигэргэттэ.
Москва уобалаһын Коломнатыттан кэлбит социокултуурунай бырайыактары сүрүннээччи Юлия Младенцева эппитинэн, ситиһии -– биир сүрүннээх үлэ түмүгэ.
Пуорум бырагыраамата олус киэҥ. Араас кейстар, дискуссиялар уо.д.а. буоллулар.
Тэрээһиннэргэ эспиэрдэр аныгы технологиялар кинигэ ааҕааччытын буларга хайдах көмөлөһөрүн көрдөрдүлэр. Билигин айар ыччаты кытары үлэ ордук суолталаах. Аныгы бибилэтиэкэ -– киһи кыаҕын арыйарга көмөлөһөр дьиҥнээх социальнай лиип. Онуоха сүрүн үнүстүрүмүөнүнэн куонкурустар буолаллар: куонкурустар талааннары эрэ арыйбаттар, бибилэтиэкэҕэ саҥа ааҕааччылары тардаллар.
Пуорум бүтэһик күнэ эрэгийиэн култуураҕа куодун оҥорууга ананна. Бу күн сүрүн түгэнинэн ыччат бибилэтиэкэтин бастыҥ бырайыагар Бүтүн Арассыыйатааҕы III куонкурус финала буолла. Куонкуруска уон бырайыак киирбит. Дьүүллүүр сүбэ бэрэссэдээтэлэ Ирина Михнова биир кыайыылааҕы быһаарар олус ыараханын бэлиэтээтэ. Кыттааччылар бары элбэх бэлэҕи туттулар. Үгүс бырайыак анал бириистэринэн бэлиэтэннэ. Кинилэртэн Арассыыйа судаарыстыбаннай бибилэтиэкэтин анал бириистэрин Уус Алдан кииннэммит бибилэтиэкэтиттэн Тамара Орлова уонна Дьокуускайдааҕы кииннэммит бибилэтиэкэттэн Нина Жиркова уо.д.а. туттулар. Медиакиин салайааччыта Аина Прибылыхха Арассыыйа судаарыстыбаннай бибилэтиэкэтигэр стажировкаланарга сэртипикээт туттарылынна.
Дьокуускайдааҕы кииннэммит бибилэтиэкэ тиһигин дириэктэрэ Нюргуяна Решетникова кэлэктиип түмсүүлээх үлэтин, бэстибээл уонна пуорум хайысхаларыгар бэлэмнэниигэ таһымнаах сыһыаны бэлиэтээтэ.
Арассыыйа эдэр бибилэтиэкэрдэрин XIII пуорума 2028 сылга Самара куоракка ыытыллара быһаарылынна.
(Дьокуускайдааҕы кииннэммит бибилэтиэкэ ситимин пресс-киинин матырыйаалынан)