Саха сиригэр ийэ тылларынан тахсар интэриниэт-ресурстар ахсааннара бүтэһик биэс сылга түөрт төгүл элбээтэ. Бу туһунан СӨ Инновацияҕа, сыыппара сайдыытыгар уонна инфокоммуникационнай технологияларга миниистирэ Петр Николаев Национальнай бэчээт күнүгэр өрөспүүбүлүкэтээҕи СМИ, издательство дьыалатын уонна полиграфия бэрэстэбиитэллэрин наҕараадалыыр тэрээһиҥҥэ тыл этиитигэр иһитиннэрдэ. Бу туһунан ЯСИА суруйар.
«Бүгүн биһиги саха суруналыыстыкатын үйэлээх үгэстэрин эрэ буолбакка, сүрүн соруктарын — норуот куолаһа буолууну, биһиги уратыбытын, төрөөбүт тылбытын, култуурабытын, үгэстэрбитин уонна сиэрбитин-туоммутун харыстыыры кэрэһилиир бырааһынньыгы бэлиэтиибит. Сылтан сыл Саха сирин СМИ-лэрэ бэйэлэрин үрдүк идэлэрин таһымын уонна уопсастыбаҕа суолталарын бигэргэтэллэр. Өрөспүүбүлүкэҕэ 200-тэн тахса СМИ, ол иһигэр электроннай, бэчээттэнэр уонна ситим таһаарыылара, бэлиэтэммит. Улуустааҕы уонна өрөспүүбүлүкэтээҕи хаһыаттар уопсай тиражтара 40 тыһ. экз. тахса. Бүтэһик биэс сылга төрүт тылларынан тахсар интэриниэт-ресурстар ахсааннара 20-тэн 84-кэ диэри элбээтэ», — диэтэ миниистир.
Петр Николаев Саха сирин бырабыыталыстыбатын бэрэссэдээтэлин солбуйааччыта Анатолий Семенов Махтал суругун «Улус Медиа» ситим-таһаарыы кылаабынай эрэдээктэрин солбуйааччытыгар Зинаида Григорьеваҕа, «Улус Медиа» ситим-таһаарыы анал кэрэспэдьиэнигэр Эвелина Поповаҕа, «Үөһээ Бүлүү» хаһыат эрэдээксийэтин корректорыгар Капитолина Долгуноваҕа, бу хаһыат кылаабынай эрэдээктэригэр Кристина Семеноваҕа, Дьокуускайдааҕы типография атыы-эргиэн отделын кылаабынай дизайнерыгар-верстальщигар Айталина Сивцеваҕа туттарда.
Элбэх сыллаах үтүө суобастаах үлэлэрин, Саха сирин нэһилиэнньэтин бэчээт уонна информационнай хааччыйыы сайдыытыгар киллэрбит кылааттарын иһин, ону таһынан Национальнай бэчээт күнүнэн «Саха Өрөспүүбүлүкэтин бэчээтин туйгуна» түөскэ кэтиллэр бэлиэни «Кыым» хаһыат кылаабынай эрэдээктэрин солбуйааччытыгар Альберт Капрыновка, «Эркээйи» эрэдээксийэ тэхиниичэскэй эрэдээктэригэр Дария Михайловаҕа, Дьокуускайдааҕы өрөспүүбүлүкэтээҕи типография бэчээттиир сыаҕын 6-с разрядтаах исписэлиискэ Сергей Тарасовка туттардылар.
Элбэх сыллаах үтүө суобастаах үлэлэрин, Саха сирин бэчээтин эйгэтин сайдыытыгар тус кылааттарын иһин Саха сирин Инновацияҕа, сыыппара сайдыытыгар уонна инфокоммуникационнай технологияларга министиэристибэтин Бочуотунай грамотатынан Саха сирин «Сахабэчээт» судаарыстыбаннай автономнай тэрилтэтин «Далбар Хотун» сурунаалын эрэдээксийэтин эрэдээктэрэ Анна Павлова, «Сахабэчээт» судаарыстыбаннай автономнай тэрилтэтин учуот уонна отчуот отделын бастыҥ бухгалтера Надежда Слепцова наҕараадаланнылар.
Саха сирин ыччат дьыалаларыгар уонна социальнай коммуникацияларга министиэристибэтин Махтал суруга Саха сирин «Сахабэчээт» судаарыстыбаннай автономнай тэрилтэтин «Улус Медиа» ситим-таһаарыытын кылаабынай эрэдээктэригэр Юлия Филипповаҕа туттарылынна.
Арассыыйа суруналыыстарын сойууһун Саха сиринээҕи салаатын «Суруналыыстыкаҕа кылаатын иһин» Үрүҥ көмүс бэлиэтэ Саха сирин «Сахабэчээт» судаарыстыбаннай автономнай тэрилтэтин «Саха сирэ» хаһыатын кэрэспэдьиэнигэр Сайаана Львоваҕа туттарылынна. Арассыыйа суруналыыстарын сойууһун Саха сиринээҕи салаатын Дипломун Саха сирин «Сахабэчээт» судаарыстыбаннай автономнай тэрилтэтин «Забота – Арчы» өрөспүүбүлүкэтээҕи хаһыатын кэлэктиибэ тутта.