Саха сирин буойуттарыгар пааматынньык «Өйдөбүнньүк бастионнара» диэн патриотическай бырайыак чэрчитинэн туруоруллуоҕа.
Бу туһунан Бырабыыталыстыба бэрэссэдээтэлин бастакы солбуйааччыта, РФ Бэрэсидьиэнин иһинэн өрөспүүбүлүкэ бастайааннай бэрэстэбиитэлэ Андрей Федотов Беларусь уонна Арассыыйа эрэгийиэннэрин XIII пуорумугар иһитиннэрдэ.
«Быйыл Гомельскай уобалас Лоевскай оройуонугар охтубут саха буойуттарын кэриэстээн «Өйдөбүнньүк бастионнара» мемориальнай бэлиэ туруоруллуоҕа. Бу Саха сиригэр ураты суолталаах. Чуолаан Лоевскай оройуоҥҥа, Деражичи дэриэбинэтигэр, саха норуотуттан бастакы Сэбиэскэй Сойуус Дьоруойа – Федор Кузьмич Попов көмүллэ сытар», – диэн Андрей Федотов бэлиэтээтэ.
Кини сотору Ржев анныгар Сэбиэскэй Сойуус Дьоруойа, легендарнай саха снайпера Фёдор Матвеевич Охлопков аатынан байыаннай-патриотическай лааҕыр VI ыччат симиэнэтэ саҕаланарын санатта. Манна Уһук Илин, Киин Арассыыйа, Донбасс уонна Новороссия үрдүк үөрэхтэрин кыһаларын устудьуоннарын кытта Казахстан уонна Беларусь Өрөспүүбүлүкэлэрин бэрэстэбиитэллэрэ аан бастаан кыттыахтара.
Андрей Федотов пуорумҥа тыл этиитигэр Саха Өрөспүүбүлүкэтэ уонна Беларусь Өрөспүүбүлүкэтэ өссө 1997 сыллаахха илии баттаммыт атыы-эргиэн уонна култуура эйгэтигэр бииргэ үлэлээһин туһунан сөбүлэҥ чэрчитинэн сайдарын бэлиэтээтэ. 2022 сыл от ыйыгар атыы-эргиэн өттүнэн бииргэ үлэлээһиҥҥэ икки өрүттээх үлэ бөлөҕө тэриллибитэ, оттон 2024 сылга сөбүлэҥи олоххо киллэрии дьаһалларын былаана бигэргэммитэ. Быйыл атырдьах ыйыгар Дьокуускайга үлэ бөлөҕүн уочараттаах мунньаҕа былааннанар.
Андрей Федотов Саха сирэ уонна Беларусь партнердуу сыһыаннара кэҥээн иһэрин эмиэ эттэ. 2023 сыл түмүгүнэн эрэгийиэннэр икки ардыларынааҕы табаар эргиирэ 59,3 мөл. АХШ дуолларыгар тэҥнэспитэ. 2024 уонна 2025 сылларга табаар эргиирин үүнүүтэ салҕаныаҕа.
Бииргэ үлэлээһини күүһүрдэр биир сүрүн хамсааһын – ааспыт сылга Минскэйгэ «Саха сирин тимир суоллара» АУо бэрэстэбиитилистибэтэ аһыллыбыта буолар. Бу быһаччы атыылаһыыны тэрийэргэ, логистика ороскуотун аччатарга уонна таһаҕаһы тиэрдии болдьоҕун 11 хонукка диэри кылгатарга саҥа кыахтары үөскэттэ. 2023 сыллаахха бу маршрутунан Саха сиригэр 380 туонна таһаҕас ыытыллыбыт буоллаҕына, 2024 сыл бастакы ыйдарыгар 400-тэн тахса туонна кэллэ.