От ыйын 4 күнүгэр Дьокуускайга «Туймаада-нефть» хампаанньа сапыраапкаларынан (АЗС) бэнсиин сыанатын иккис төгүлүн үрдэттэ. Холобур, АИ-92 мааркалаах бэнсиин сыаната 13 солкуобайынан үрдээбит.
«Чахчы, бүгүҥҥүттэн сыана уларыйда. Билиҥҥи олох ирдэбилэ итинник: атыылаһар сыанабыт ыараан иһэр. Маннык усулуобуйаҕа сыана күн аайы да уларыйыан сөп. Өйдөөҥ, сыананы биһиги бэйэбит олохтообоппут», — диэн хампаанньа бэрэстэбиитэлэ ЯСИА кэрэспэдьиэнигэр быһаарда.
«Туймаада-нефть» АЗС-тарыгар саҥа сыана:
- АИ-92 – 93 солк. (+13 солк.);
- АИ-95 – 96 солк. (+12 солк.);
- ДТ (дизельнэй уматык) – 106 солк. (+9 солк.).
Санатабыт, «Туймаада-нефть» бу иннинэ бэс ыйын 15 күнүгэр сыанатын эмиэ үрдэппитэ. Оттон бэс ыйын 22 күнүгэр «СибОйл» хампаанньа уматыга ыараабыта. «Саханефтегазсбыт» хампаанньа саайтыгар суруллубутунан, кинилэргэ уматык сыаната билиҥҥитэ уларыйа илик.