Бу күннэргэ сырылас куйаас күннэр туран, маннык сылааска үөрэммэтэх дьон, хаһан сөрүүкүүрүн кэтэһэн бардыбыт.
Санаабытыгар, бу куйааһы кини эрэ тохтотуон сөбүн курдук санаан, эмиэ “Тускул туох диэн билгэлиирий, хаһан сөрүүкүүрүй?” диэн “Саха сирэ” хаһыакка эрийэллэрэ үксээтэ. Норуот синоптига иһитиннэрбитинэн, бастакынан “Саха сирэ” саайтка биэрэр буолан, бу ыйытыыны киниэхэ туһаайдыбыт.
— Аҕыйах хонукка куйаарбытыгар айманан эрэллэр дуу? Бу иннинэ от ыйын билгэлиирбэр, Бөтүрүөп ардаҕын кэнниттэн сөрүүкээн барыа диэбитим. Ол бу өрөбүлтэн саҕаланар. Бээтинсэ күн куйааһынан Дьокуускайга, чугастааҕы улуустарга, Илин эҥэргэ туруоҕа – түүн +20, күнүс+34 кыраадыс итии. Ардахтаах. Бүлүү эҥэргэ түүн +15, күнүс +25. Сунтаарга түүн +13, күнүс +17 кыраадыс сылаас. Өлүөхүмэҕэ +16, +19 кыраадыс сылаас, Кэбээйигэ +20, +26 кыраадыс. Тымныы салгын Эдьигээнтэн кэлиэҕэ – түүн +10, күнүс + 12 кыраадыс. Арҕаа улуустарга — түүн +11, күнүс +16 кыраадыс, түүн +11, күнүс +14 кыраадыс сылаас. Кэлэр нэдиэлэҕэ Бөтүрүөп ардаҕын кэнниттэн хоту улуустарга эмискэ тымныйыаҕа. Халыма улуустарыгар түүн +10, күнүс +15 кыраадыс. Өймөкөөҥҥө дьэ сылыйыаҕа: түүн +16, күнүс + 26 кыраадыс. Ол оннугар ыаллыы Муома улууһугар сөрүүн: түүн +12, күнүс +17 кыраадыс. Абыйга биллэ сөрүүкүөҕэ: түүн + 9 кыраадыс, күнүс +14 . Анаабырга олох тымныйыаҕа – түүн 1, күнүс +8 кыраадыс. Өлөөҥҥө +5, +13 кыраадыс сылаас. Тиксиигэ түүн -1 тымныы, күнүс -2 тымныы . Бу эҥэр хаардыаҕа. Ол тымныыта хотуттан бэтэрээ кэлиэҕэ.
Бу күннэргэ куйааран, оҕуруот аһа “ыллыы-ыллыы” үүнэр кэмэ. Онтон, эппитим курдук, Бөтүрүөп ардаҕын кэннэ +30 кыраадыстаах куйаас күннэр түмүктэнэллэр. Илин эҥэр улуустар олохтоохторун анаан сэрэтэбин – от ыйын 11-15 күннэригэр эмискэ түүн + 10, күнүс +14 кыраадыс буолуоҕа. От ыйын 13-14 күннэригэр күүстээх ардах түһүөҕэ. Онон, күндү доҕоттор, от ыйын 12 күнүттэн 14-гэр диэри сарсыарда эмискэ турбуккут “ама, оннук этэ дуо?” диэбиттии, куйаас күннэр мэлдьэһэн кэбиһиэхтэрэ. Онон Тиксиигэ уонна хоту улуустарга хаардаан, 0 кыраадыстан 4 кыраадыска тиийэ көрдөрөн, куйаас күннэр түмүктэниэхтэрэ. Сөтүөнү сөбүлүүр дьон бу күннэргэ ууттан тахсымаҥ, оттон сөрүүнү ордорооччулар аҕыйах хонугу кэтэһиҥ. Отчуттар Бөтүрүөп ардаҕар диэри оттоомохтоон хаалыҥ. Быһата, бука бары үтүө сайын кэрэ кэмнэрин тутуһан хаалыҥ!