Өлүөхүмэ улууһун полициятын дьуһуурунай чааһыгар тэрилтэ бэрэстэбиитэлиттэн 40 тыһыынча солкуобай кэриҥэ сыаналаах электрооборудованиены өрөмүөннүүр тэрили уора сатаабыттарын туһунан сайабылыанньа киирбит. Хонтуруоллуур-аһардар пууҥҥа харабыл үлэһиттэри таһар сулууспа массыынатын түгэҕэр анал кистэлэҥ сиргэ уоруллубут мал сытарын бэлиэтии көрбүт уонна ол туһунан полицияҕа биллэрбит.
Бэрэбиэркэ кэмигэр полиция учаастактааҕы боломуочунайдара уоруллубут маллары ылбыттар уонна тэрилтэ икки үлэһитэ: Башкортостан Өрөспүүбүлүкэтиттэн төрүттээх 37 саастаах уонна Алтай кыраайыттан төрүттээх 34 саастаах эр дьон кыттыгастаахтарын быһаардылар.
Кэлин быһаарыллыбытынан, эр дьон бу сэп-сэбиргэл ууруллан турар хоһугар киирэр кыахтаахтар эбит. Уоруйахтартан биирдэстэрэ суоппардыыр бииргэ үлэлиир киһитигэр сулууспа массыынатын анныгар кистэлэҥ сири оҥорон, онно сэби-сэбиргэли кистээн, тэрилтэ территориятыттан биллэрбэккэ таһаарарга этии киллэрбит. Ол эрээри кинилэр былааннара табыллыбатах. Буруйдаахтар уорбут малларын атыылыыр санаалаах эбиттэр. РФ Холуобунай кодексатын 30-с ыстатыйатын 3-с чааһынан уонна 158-с ыстатыйатын 2-с чааһынан («Уорууга холонуу») холуобунай дьыала тэрилиннэ диэн Саха Өрөспүүбүлүкэтин ИДьМ пресс-сулууспата суруйар.