Саха сиринээҕи «Арктика суоллара» стратегическай суолталаах «Уус Куйга – Депутатскай – Үрүҥ Хайа» айан суолугар киэҥ хабааннаах үлэлэри ыытар.
Уус Куйга бөһүөлэгиттэн Депутатскай бөһүөлэгэр диэри барар тыраассата – өрөспүүбүлүкэ Арктикатааҕы зонатыгар кытаанах бүрүөһүннээх саамай уһун суол, бу Усуйаана улууһун нэһилиэнньэлээх пууннарын холбуур, сыл устата тиэйиини-таһыыны хааччыйар. Ол эрээри инфраструктура сүрүн сүһүөҕүнэн муосталар буолаллар – билигин сайыҥҥы сезоҥҥа сүрүн болҕомто онно ууруллар.
Улуус географиятын уратытынан манна суол учаастактара бэйэ-бэйэлэрин кытта 41 муостанан силбэһэллэр. Хайалар, үрэхтэр уонна элбэх үрүйэлэр муостаны ирдииллэр. Балаҕан ыйыгар диэри былааннаах-сэрэтэр үлэлэр км 142+825, км 145+320, км 156+132 үрүйэлэри туоруур муосталарга ыытыллаллар. Бу үс тутуу өссө 1980-с сылларга оҥоһуллубуттара.
Муосталары өрөмүөннээһиҥҥэ бэлэмнэнии эрдэттэн саҕаламмыта: саас кыһыҥҥы суолунан Усуйаана улууһугар наадалаах ТМЦ – тутуллар мастар, тэриллэр (болуот, гаайка), кырааска, антисептик тиэрдиллибиттэр. От ыйын саҕаланыытыгар Уус Куйгаҕа муоста тутуутун үлэһиттэрин биригээдэтэ хомуллубут, кинилэр үлэни толоруохтара – эргэ конструкциялары көтүрүөхтэрэ, прогоннары уларытыахтара, тротуарнай дуоскалары уонна перилалары кырааскалыахтара, дьапталҕаны өрөмүөннүөхтэрэ.
«Арктика суоллара» тэрилтэ массыына суолларын уонна искусственнай тутуулары эксплуатациялааһын отделын начаалынньыга Ньургун Слепцов тоһоҕолоон эттэ:
— Быйыл биһиэхэ үс улахан эбийиэк баар. Киэҥ далааһыннаах өрөмүөҥҥэ Усуйаана уонна Муома суолун учаастактарын үлэһиттэрэ тардылыннылар. Билигин күүһү бүтүннүү – үлэһиттэри, оборудованиены уонна матырыйааллары бастакы муоста туорааһыныгар илдьэбит. Муосталары сыллата өрөмүөннүүбүт, кинилэр улуус тырааныспарын ситимнэригэр улахан суолталаахтар. Усус Куйгаттан Депутатскайга бородууксуйа, уматык, ньиэп таһыллар, онон куттала суох сырыыны хааччыйыы – тэрилтэ сүрүн соруга.
«Арктика суоллара» тэрилтэ үлэһиттэрин үлэлэрэ элбэх – халлаан тымныйыан иннинэ кыһыҥҥы көрүүгэ-истиигэ бэлэмнэнии үлэлэрин бүтэрэ охсуохтаахтар: профилирование, түһүүлэри-тахсыылары былааннааһын.
Туох баар дьаһаллар – муосталар да, суоллар да, Арктикатааҕы улуустарга эрэллээх тырааныспар сибээһин хааччыйыыга туһуланаллар.
