Атырдьах ыйын 4 күнүгэр Саха сирин устудьуоннарын тутар этэрээттэрин 60 байыаһын «Полярные авиалинии» авиахампаанньа икки сөмөлүөтүнэн халаан уутун содулун туоратыыга көмөлөһө Дьааҥы улууһугар көтүтүөхтэрэ.
Маннык быһаарыыны бүгүн Саха Өрөспүүбүлүкэтин Гражданскай оборуонаҕа уонна нэһилиэнньэ олоҕун-дьаһаҕын куттала суох буолуутун хааччыйар миниистир Дмитрий Лепчиков салайааччылаах сайыҥҥы халаан уутун куттала суох аһарыыга суһал ыстаап мунньаҕар ыллылар.
«Биисинэс түмсүү бэрэстэбиитэллэрэ Дьааҥыга халаан содулун туората барар устудьуоннарга аналлаах үлэ тэриллэрин биэрдилэр. Этэрээттэргэ суһаллык наадалаах тэриллэр атыылаһыллыннылар: ломнар, тоһоҕо тардааччылар, 1000 паара үлэ бэрчээккэтэ, уһаарыллыбыт сүгэлэр уонна өтүйэлэр. Байыастар олорор сирдэрин уонна аһылыктарын боппуруоһа быһаарылынна», — диэн тэрээһиҥҥэ Саха сирин Ыччат дьыалаларыгар уонна социальнай коммуникацияларга миниистирин солбуйааччы Александр Максимов иһитиннэрдэ.
Стройотряд байыастара гуманитарнай таһаҕаһы тиэрдиэхтэрэ уонна Дьааҥы улууһун халааҥҥа эмсэҕэлээбит Суордаах, Дулҕалаах уонна Сайдыы нэһилиэктэрин олохтоохторугар дьиэлэрин-уоттарын чөлүгэр түһэрэллэригэр көмөлөһүөхтэрэ.
«Атырдьах ыйын 4 уонна 5 күннэригэр эмсэҕэлээбит нэһилиэктэртэн оҕолору Дьокуускай куоракка аҕалар үлэни саҕалыахпыт, онно кинилэр «Энергетик» лааҕырга сынньаналлара тэриллиэҕэ», — диэн Дмитрий Лепчиков сорудах туруорда.
Кини ону таһынан, сарсын, атырдьах ыйын 3 күнүгэр, Дьааҥы улууһугар ЫБММ Ми-8 бөртөлүөтэ гуманитарнай таһаҕаһы уонна Саха сирин Тутууга министиэристибэтин исписэлиистэрин тиэрдиэҕин туһунан эттэ.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата