Ил Дархан Айсен Николаев атырдьах ыйын 3 күнүгэр «Якутия, вперед!» биэриигэ таҕыста.
Кини бу биэриигэ чугастааҕы күннэргэ Саха сирин соҕуруу өттүгэр хас да тыһыынча туонна АИ-92 уонна АИ-95 мааркалаах бэнсиин аҕалыллыахтааҕын туһунан эттэ. Ол курдук, Ил Дархан РФ бырабыыталыстыбатын бэрэссэдээтэлин солбуйааччы Александр Новактыын кэпсэтиитин уонна өрөспүүбүлүкэ суһал штабын үлэтин түмүктэринэн, «НК «Роснефть» ПАУо уонна «Саханефтегазсбыт» АУо кытары уматыгы эбии аҕалыы туһунан сөбүлэһии түһэрсилиннэ.
Айсен Николаев уматыгы тиэйии, аҕалыы саҕаланна да, Саха сирин соҕуруу өттүгэр ньиэп базаларыгар уматыгы биэрии нуорматын улаатыннаралларын туһунан эттэ. Ол бу нэдиэлэҕэ буолуон сөп.
Кини соҕуруу оройуоннарга уматыгынан хааччыллыы түргэнник туруктанарын туһугар эрэгийиэн бырабыыталыстыбата туһааннаах дьаһаллары ыытарын туһунан эттэ.
Ил Дархан ону таһынан дойдуга уматыгынан хааччыллыы балаһыанньата сыыйа-баайа тупсарын бэлиэтээтэ. Хотугу сиргэ таһаҕаһы таһыы чэрчитинэн, өрөспүүбүлүкэҕэ 105,5 тыһыынча туонна бэнсиини, 71,9 тыһыынча туонна дизель уматыгын уонна 5,5 тыһыынча туонна авиационнай кэрэһиини аҕалыы былааннанар.