Ыйааһыны түһэрэр дьон бурдук аһыттан (килиэптэн) букатыннаахтык аккаастаныахтаахтар диэн киэҥник тарҕаммыт өйдөбүл доруобуйаҕа охсуулаах буолуон сөп. Тоҕо диэтэххэ, килиэпкэ киһиэхэ туһалаах элбэх битэмиин баар. Бу туһунан РИА Новости мэдиссиинэ билимнэрин кандидата, диетолог-быраас Татьяна Солнцева иһитиннэрдэ.
«Ыйааһыннарын түһэриэн баҕарар дьоҥҥо биһиги хаһан даҕаны: «Бурдук аһыттан букатын аккаастаныҥ», — диэбэппит. Биһиги чэпчэки, сөптөөх нуорманан аһыыр туһунан кэпсиибит. Тугу баҕарар аһара элбэҕи сиэтэххэ, киһи уойуон сөп. Оттон туһалаах килиэп, төттөрүтүн, ыйааһыны түһэрэргэ көмөлөһөр», — диэтэ Солнцева.
Быраас быһаарарынан, киһи хатыҥыр буоларын туһугар сиэбит аһынааҕар элбэҕи хамсанан уматыахтаах. Ону таһынан, туһалаах эттиктэринэн байытыллыбыт килиэп ас буһарыытын, оһоҕос микробиотатын тупсарар уонна киһи метаболизмыгар үчүгэйдик дьайар.
«Бу барыта биһиэхэ наадата суох куһаҕан сыалар, холестерин уонна судургу саахардар хааҥҥа түргэнник оборуллалларын бытаардар. Ол эрээри, хайдах да үчүгэй килиэп буолбутун иһин, киилэнэн сиир буоллахха, киһи уойар. Тоҕо диэтэххэ, онно углеводтар эмиэ бааллар», — диэн бэлиэтээтэ испэсэлиис.