Петр Дмитриевич Каратаев 1956 сыллаахха балаҕан ыйын 12 күнүгэр Саха АССР Кэбээйи оройуонун Баҕадьа сэлиэнньэтигэр төрөөбүтэ.
1984 с. Саха судаарыстыбаннай университетын мэдиссиинэҕэ факультетын бүтэрбитэ. Үлэтин өрөспүүбүлүкэтээҕи килиниичэскэй балыыһа урологияҕа отделениетыгар ординатор-бырааһынан саҕалаабыта. Отделениеҕа үлэлээбит сылларыгар (1984-1990 сс.) саҥаны көҕүлүүр быраас быһыытынан биллибитэ, урология уустук ыарыыларын чинчийии уонна эмтээһин аныгы ньымаларын баһылааһыҥҥа көхтөөхтүк кыттыбыта.
Петр Каратаев 1990-1991 сс. өрөспүүбүлүкэтээҕи килиниичэскэй балыыһа идэлээх сойууһун босхоломмут бэрэссэдээтэлинэн, 1991-1993 сс. психоневрология өрөспүүбүлүкэтээҕи диспансерын сүрүн бырааһынан үлэлээбитэ. Эдэр, талааннаах салайааччы 1993 с. өрөспүүбүлүкэтээҕи килиниичэскэй балыыһа генеральнай дириэктэрин — 1999 доруобуйа харыстабылын миниистирин солбуйааччытын курдук эппиэттээх дуоһунаска ананан, оччотооҕу олох социальнай-экэнэмиичэскэй ыарахаттарыттан иҥнибэккэ-толлубакка, эмп улахан тэрилтэтин сатабыллаахтык салайбыта.
1999–2004 сс. Саха Өрөспүүбүлүкэтин 1 нүөмэрдээх балыыһатын — Мэдиссиинэ Национальнай киинин генеральнай дириэктэрин солбуйааччытынан үлэлээбитэ.
2004 с. сэтинньи ыйтан СӨ Доруобуйа харыстабылын министиэристибэтэ эмп тэрилтэтин уопуттаах, талааннаах салайааччытын П. Д. Каратаевы өрөспүүбүлүкэ биир бөдөҥ тэрилтэтин — Онкология өрөспүүбүлүкэтээҕи диспансерын салайааччытынан анаабыта.
Инникини өтө көрөр салайааччы
Петр Дмитриевич Каратаев Саха сирин доруобуйатын харыстабылын кэскиллээх тэрийээччилэриттэн биирдэстэринэн буолбута. 2000 с. Мэдиссиинэ Национальнай киинин генеральнай дириэктэрин солбуйааччытынан үлэлиир кэмигэр, 2025 с. диэри кэмҥэ Саха Өрөспүүбүлүкэтин доруобуйатын харыстабылын сайыннарыы кэлимсэ бырагырааматын оҥорууга актыыбынай кыттыыны ылбыта. Өрөспүүбүлүкэ мэдиссиинэтин бөдөҥ тэрилтэлэригэр үлэлиир сылларыгар кини балыыһалар материальнай баазаларын бөҕөргөтүүгэ, аныгы аппаратуранан, тэриллэринэн хааччыллыыларыгар улахан кылаатын киллэрбитэ.
Кини салайааччы быһыытынан квалификациятын өрүү үрдэтэрэ. Ол курдук, 1993-1995 сс. РФ бэрэсидьиэнин Арассыыйа салайыыга академиятыгар үөрэммитэ. Ол сылларга бу академияны бүтэрбит бастакы быраастартан биирдэстэрэ этэ.
Мас тардыһыытыгар успуорт бастакы маастара
Петр Каратаев — өрөспүүбүлүкэҕэ биллэр-көстөр спортсмен. Саха судаарыстыбаннай университетын мэдиссиинэҕэ факультетыгар үөрэнэ сылдьан, 1978 с. мас тардыһыытыгар университекка тэриллибит «Көмүс мас» күрэхтэһиини көҕүлээччилэриттэн биирдэстэрэ этэ. 1981 с. успуорт бу көрүҥэр Петр Каратаев Дьокуускай куорат чөмпүйүөнүнэн, 1983 с. Баһылай Манчаары аатынан өрөспүүбүлүкэтээҕи спартакиада кыайыылааҕынан буолбута. Өбүгэлэрбит оонньууларын — мас тардыһыытын чөлүгэр түһэриини саҕалааччылартан биирдэстэрэ Петр Каратаев манна элбэх күүстээх утарылаһааччыларын олорор сирдэриттэн логлорута тардыталаан, ыга туппут мастарын турута тардыалаан кыайыылаах тахсан, бу көрүҥҥэ Саха АССР успуордун бастакы маастара буолбута уонна аан бастаан оонньоммут муҥутуур кыайыылаах титулун ылбыта.
Салгыы Петр Каратаев мас тардыһыытыгар эдэр спортсменнар настаабынньыктарынан буолан, өрөспүүбүлүкэ үгүс күрэхтэһиилэрин тэрийиигэ кыттыбыта. Кэккэ сылларга Таатта улууһугар Харбалаахха бу көрүҥҥэ успуорт бастакы маастара Петр Каратаев бирииһигэр мас тардыһыытыгар күрэхтэһии ыытыллан, үгүс эдэр спортсмеҥҥа дьиҥнээх оскуоланан буолбута.
П. Д. Каратаев мас тардыһыытын национальнай успуорт көрүҥүн быһыытынан сайыннарыыга, саҥа таһымҥа таһаарыыга (тардыһыы ньымаларын, быраабылаларын тупсарыы уо. д.а.) улахан үлэни ыыппыта. Ити сылларга СӨ мас-рестлиҥҥэ (мас тардыһыытыгар) федерацията тэриллибитэ.
Үрдүк категориялаах доруобуйа харыстабылын тэрийээччи Петр Каратаев доруобуйа харыстабылын сайдыытыгар улахан өҥөлөрүн иһин СӨ уонна РФ доруобуйа харыстабылын туйгуна, СӨ «Гражданскай килбиэн» бэлиэлэринэн наҕараадаламмыта, киниэхэ «Саха Өрөспүүбүлүкэтин үтүөлээх бырааһа» бочуоттаах аат иҥэриллибитэ.
Мас тардыһыытыгар Саха АССР успуордун бастакы маастара, бастакы Муҥутуур кыайыылааҕа, өрөспүүбүлүкэтээҕи категориялаах судьуйа Петр Каратаев «Физическэй култуура уонна успуорт сайдыытыгар өҥөлөрүн иһин» бочуоттаах бэлиэнэн, Арассыыйа Олимпийскай кэмитиэтин дьупулуомунан наҕараадаламмыта, СӨ «Сахаада-успуорт XX үйэ» ассоциация лауреатынан буолбута.
Петр Дмитриевич Каратаев — иллээх, дьоллоох ыал аҕа баһылыга. Кэргэнин, биир идэлээҕэ Галина Васильевнаны кытта бэйэлэрин үлэлэрин эйгэтигэр сыаналанар, билиниллэр исписэлиис буолбут 3 уолу иитэн таһаардылар. Галина Васильевна уонна Петр Дмитриевич Каратаевтар тапталлаах сиэннэр эйэҕэс эбээлэрэ, эһээлэрэ буоллулар.
Биир идэлээх доҕотторуҥ ааттарыттан Пантелеймон Семенов, Валериан Николаев, Леонид Тимофеев, Семен Аргунов, Василий Назаров.