Кэбээйи улууһун борокуруора Холуобунай кодекс 160 ыст. 3 ч. (иҥэринии, ол эбэтэр буруйданааччыга итэҕэйиллибит улахан суумалаах харчыны уоруу) буруйданар олохтоох дьахтарга судаарыстыбаннай буруйдааһыны өйөөтө.
Суут быһаарбытынан, Сангаар бөһүөлэгин олохтооҕо дьахтар Үлэ уонна социальнай сайдыы министиэристибэтин Кэбээйитээҕи нэһилиэнньэ социальнай көмүскэлин управлениетыгар кэрэ сэбэрэ эйгэтигэр урбаанынан дьарыктаныан баҕарарын туһунан докумуоннары биэрбит. Ол эрээри, дьахтар бу эйгэнэн дьарыктанар санаата суох эбит. Социальнай хантараагынан 330 тыһ. солк. суумалаах харчыны ылан баран бэйэтэ бас билэринэн атын сыалга туһаммыт.
Улуус борокуратуурата бэрэбиэркэлээбит матырыйаалынан холуобунай дьыала тэриллибит, хоромньуну дьахтар силиэстийэ кэмигэр төнүннэрбит.
Суут быһаарыытынан, дьахтары 160 тыһ. солк. суумаҕа ыстарааптаабыттар.
Бириигэбэр сокуоннай күүһүгэр киирэ илик, өрүттэр үҥсүү (апелляция) биэриэхтэрин сөп. Бу туһунан Борокуратуура саайтыгар суруйаллар.