Субуота күн Саха циркэтин уораҕайа оҕо күйгүөр саҥатынан туолла. Манна »Тооку» оҕо бэстибээлэ буолла.
Быйыл Саха тэлэбиидэнньэтэ уонна Марфа, Сергей Расторгуевтар ааттарынан Судаарыстыбаннай циркэ кыттыһан, бииргэ ыыттылар. Циркэлэр ойуулуктарынан чаҕылхай көрдөрүү туруордулар. Кэрэхсэбиллээҕэ диэн, тэрээһин барыта сахалыы тылынан ыытыллар.
Кырачааннар ойуулуктары, дьоруойдар ааттарын билэллэр, тэҥҥэ ыллаһа, бэл, үҥкүүлэһэ олордулар. Оҕолор сахалыы саҥараллара үөрдэр. Хотугу таҥастаах оҕолор үҥкүүлүү киирбиттэригэр: «Билигин Имана киириэҕэ!» — дэһэллэр.
Чахчы, оҕолорбут төлөпүөҥҥэ, интэриниэккэ аһара ылларан, төрөөбүт тылларын умнар кэмнэригэр »Тооку оҕолоро» диэн баар буолбуттара көстөр. Кинилэр тута биллэллэр — сахалыы сайаҕастык саҥараллар, сахалыы ойуулуктары көрөллөр, билэллэр.
Бу Саха тэлэбиидэнньэтэ бүтүн оҕо ханаалын арыйан, сыллата хас да саҥа сахалыы ойуулуктары оҥорон таһааран, нууччалыылары тылбаастаан, күнүстэри-түүннэри көрдөрөн, бу маннык бэстибээллэри тэрийэн, саха тылын сайыннарыыга, оҕону иитиигэ улахан кылааттарын киллэрэллэр.
Быйыл »Тооку» уонна »Чысхаан» ойуулуктар Бүтүн Арассыыйатааҕы »Тэфи» тэлэбиидэнньэ куонкуруһугар номинант буоллулар. Бу — улахан ситиһии!
Быйыл төрдүс төгүлүн ыытыллыбыт ойуулук сценарийын куонкуруһугар кыайыылаах аата билиннэ. Наталья Дьяконова кылаан чыпчаал аатын ылан, кини айбыт ойуулуга оҥоһуллан, тэлэбиидэнньэҕэ көстүөҕэ.
Бэстибээлгэ элбэх маастар-кылаастар, куонкурустар буоллулар, оҕолору оонньоттулар.
