Арассыыйа сорох олохтоохторо кирэдьиит каартатыгар укпут харчыларын баан атын иэһи, холобур, нолуок иэһин сабарга устан ылар түгэнигэр түбэстилэр. Ол түмүгэр каартаҕа иэс хаалан хаалар, төлүүр болдьоҕун аһардан кэбиһэллэр, бырыһыан ааҕыллар диэн юрист Евгений Фурин сэрэтэр. Бу туһунан Банки.ру суруйар.
Бу төрүөтэ – Гражданскай кодекс 855-с ыстатыйатынан олохтоммут счеттан харчыны устуу уочарата буолар. Счекка киирбит бары ирдэбиллэри толорууга харчы тиийбэт түгэнигэр, баан бэйэтэ ханнык ирдэбил ордук суолталааҕын талар кыаҕа суох. Нолуок сулууспатын иэһи хомуйууга сорудаҕа үһүс уочаракка киирсэр, оттон кирэдьиити төлөөһүнү киллэрэн туран, атын төлөбүрдэр бэһис уочаракка сылдьаллар.
«Кирэдьиит каартатын счетугар Федеральнай нолуок сулууспатын (ФНС) ирдэбилэ турар буоллаҕына уонна эһиги каартаны сабарга диэн, холобур, 50 тыһ. солк. киллэрбит буоллаххытына, баан бу харчыны бастаан нолуок иэһигэр ыытыан сөп. Ол эрэ кэнниттэн хаалбыт сумма кирэдьиити сабарга барыаҕа», – диэн быһаарар Евгений Фурин.
Маныаха баан туһаныллыбатах кирэдьиит лимиитин нолуок иэһигэр устуон сатаммат: каартаҕа 300 тыһ. солк. баар буоллаҕына, нолуок сулууспата ити сууматтан 100 тыһ. былдьыырга күһэйэр кыаҕа суох. Ол эрээри, киһи бэйэтэ каартаҕа харчы уктаҕына, киллэрбит харчыта баан счетугар кини бэйэтин үбэ буолар – төлөнөр дьаһал чопчу ол харчыга туһуланар.
Бу боппуруос 2025 сыл сэтинньи 1 күнүттэн ыла күүһүрдэ, ФНС дьон мөккүөрэ суох нолуокка иэһин суукка тахсыбакка эрэ хомуйар кыахтаммыта буолар. Бастаан киһиэхэ төлүүргэ ирдэбил ыытыллар, онтон – хомуйуу туһунан ирдэбил быһаарыы тахсар. Маҥнай иэстээх киһи иэһин төлүүрүгэр сурук ыыталлар, онтон ирдиир быһаарыыны таһаараллар. Ол кэнниттэн иэһин төлүүрүгэр эбэтэр сөбүлэспэтин биллэрэригэр сэттэ үлэ күнэ бэриллэр. Ити кэннэ ФНС бааҥҥа счеттан харчыны устарга сорудах ыытыан сөп.
«Дьон нолуокка тус кэбиниэтигэр сэдэхтик киирэр, иэһин билбэккэ хаалар. Кирэдьиит каартатыгар киллэрбит харчыта соһуччу сүтэн хааллаҕына эрэ билэр», – диэн юрист бэлиэтиир. Онон болҕомтолоох буолуҥ, нолуок иэһин утары төлөөн иһиҥ.