Бүгүҥҥү Суол хаһаайыстыбатын үлэһиттэрин идэлээх бырааһынньыктарын Чурапчытааҕы «Дорожник» ХЭУо үлэһиттэрэ ураты өрө көтөҕүллүүлээхтик бэлиэтииллэр.
Суол – олох хорук тымыра. Бу “тымыры” хамсатар, улуус иһинээҕи уонна улуустар икки ардыларынааҕы суолу-ииһи хонтуруолга тутан олорор тэрилтэ устуоруйата дириҥ силистээх-мутуктаах.
Тэрилтэ быйыл 75 сыллаах өрөгөйдөөх үбүлүөйүн бэлиэтиир. 20-с үйэ 1951 сылыгар Чурапчыга суолу көрөр-истэр аналлаах нэһилиэктэр икки ардыларынааҕы суол оҥорор “538-с учаастак (ДЭУ-538)” тэриллибитэ. Оччотооҕу кэмҥэ, биллэн турар, тиэхиньикэ да аҕыйах, үлэ үксэ илиинэн барар уустук кэмигэр, Чурапчы суолун оҥорооччулар Охотскай уонна Халыма суолларын тупсарыыга бастакы олугу уурбуттара. Кэм-кэрдии уларыйан истэҕин аайы, тэрилтэ хас да төгүл аата уонна таһыма уларыйан испитэ.
«Чурапчы суоллара» (Чурапчы-Автодор”) уопсастыба буола сылдьан баран, «Дорожник» ХЭУо билигин урукку сэбиэскэй кэминээҕи үтүө үгэстэри, күүстээх исписэлиистэр баазаларын уонна үлэ уопутун иҥэрбит кыахтаах тэрилтэҕэ тиийэ үүннэ.
Бүгүҥҥү күҥҥэ суол оҥорооччулар тэрилтэлэрин уопуттаах салайааччы Василий Тимофеев ситиһиилээхтик салайар. Тэрилтэ РФ Бэрэсидьиэнэ Өлүөнэ эбэни туоруур муостаны тутарга, Алданы туоруур муоста тутуутун түргэтэтэргэ, «Халыма» федеральнай айан суолун туругун тупсарарга сорудах биэрбитин толорон, бэйэтин иннигэр улахан соруктары туруоран үлэлиир.
“Дорожник” ХЭУо генеральнай дириэктэрэ Василий Тимофеев бэлиэтииринэн, тэрилтэни атаҕар туруорбут салайааччыларынан Петр Наумовынан, Федор Чичигинаровынан, Гаврил Владимировынан тэрилтэ 40-ча үлэһитэ киэн туттар, истиҥник саныыр.
Салайааччы «аныгы кэм үйэтэ буолан, “Дорожник” ХЭУо саҥа технологияҕа эппиэттиир күүстээх аныгы тиэхиньикэнэн толору хааччыллыылаах. Ол курдук быйыл саас тэрилтэ бэйэтин кыаҕын өссө күүһүрдэн, лизинг көмөтүнэн саҥа анал тиэхиньикэни, суолу “разметкалыыр” массыынаны атыылаһан үлэлэтэбит» диэн бэлиэтиир.
Тэрилтэ биир сүрүн эбийиэгинэн суол аспаалын матырыйаалын оҥорон таһаарар собуот буолар. Онон миэстэтигэр, собуокка олус наадалаах үлэни биэс киһи автоматизированнай тэрилинэн үлэлииллэр. Соторутааҕыта тэрилтэ үлэһиттэрэ «Олоххо туһалаах инфраструктура» (“Инфраструктура для жизни”) национальнай бырайыак чэрчитинэн Чурапчы улууһугар улахан суолталаах «Бөтүҥ» региональнай суол 15 километраах учаастагын хаачыстыбалаахтык уонна кэмигэр өрөмүөннээн бүтэрдилэр.
Маны таһынан, «Халыма» федеральнай суол өрөмүөнүгэр, өрөспүүбүлүкэтээҕи уонна улуус нэһилиэктэрин икки ардыларынааҕы суоллары туруктаах оҥорууга сыраларын ууран үлэлииллэр. “Ол курдук, өрөспүүбүлүкэтээҕи Бөтүҥ, Абалаах, Чыаппара суолларын оҥорууга хантараахтаахпыт”, — диэн бэлиэтиир Василий Тимофеев.
Төлөй нэһилиэгин баһылыга Игорь Николаев «быйыл олохтоох көҕүлээһин бырагыраама чэрчитинэн 2 км суолу өрөмүөннүүр үлэ барда. Маны таһынан, сыл аайы «Дорожник» ХЭУо-ны кытта дуогабар түһэрсэн, суолбутун астарабыт (грейдер үлэтэ). Онон улууспут киэн туттар тэрилтэтэ нэһилиэктэри кытта ыкса сибээстээхтик үлэлэһэн абырыыр. Түгэнинэн туһанан, «Дорожник» тэрилтэ 75 сыллаах үбүлүөйүнэн истиҥник эҕэрдэлиибит» диэн санаатын үллэһиннэ.
Тэрилтэ сүрүн баайа — туруу үлэһит дьон буолаллар. 75 сыл тухары хас да көлүөнэ суолу оҥорооччулар убаастабыллаах үлэ бэтэрээннэрэ буолан, эдэр көлүөнэҕэ бэйэлэрин маастарыстыбаларын тиэрдэллэр. Киһи тулуйбат куйааһыгар, кыһыҥҥы чысхаан тымныыга, күһүҥҥү сигирээн кэмҥэ суол үлэһиттэрин сыралаах үлэлэрин “Дорожник” тэрилтэ үлэһиттэрэ 75 сыл устата толору билэн кэллилэр. Онон бүгүҥҥү бырааһынньыктарын «Дорожник” ХЭУо үлэһиттэрэ өрө көтҕүллэн туран бэлиэтээтилэр.