Ону таһынан быйыл сибээс аныгы көрүҥүнэн өссө 11 нэһилиэнньэлээх пууну хааччыйыы торумнарын туһунан Саха сирин Инновацияҕа, сыыппара сайдыытыгар уонна инфокоммуникационнай технологияларга миниистирэ Петр Николаев иһитиннэрдэ.
Сыыппара инфраструктуратын сайыннарыы уонна ыраах сытар нэһилиэнньэлээх пууннар олохтоохторун аныгы сибээһинэн хааччыйыы үлэтэ РФ бэрэсидьиэнэ Владимир Путин көҕүлүүр “Экономика данных и цифровая трансформация государства” национальнай бырайыак соруктарыгар сөп түбэһэн ыытыллар.
Түргэн мобильнай интэриниэтинэн Өлөөн улууһун Ээйик, Өймөкөөн улууһун Орто Балаҕан, Төрүт, Биэрэк Үрдэ уонна Үчүгэй, Эдьигээн улууһун Баханай сэлиэнньэлэрин олохтоохторо туһанар кыахтаннылар.
11 нэһилиэнньэлээх пууҥҥа интэриниэти киллэрии үлэтэ салҕанар.
Саха сирин олохтоохторо өрөспүүбүлүкэҕэ мобильнай сибээһи сайыннарыыга кыттыахтарын сөп. Ол курдук, “Судаарыстыбаннай өҥөлөр” порталга 2027 сылга мобильнай интэриниэккэ холбонуохтаах нэһилиэнньэлээх пууннарга куоластааһын ыытыллар. Бэйэ нэһилиэнньэлээх пуунун https://www.gosuslugi.ru/inet сигэнэн киирэн өйүөххэ сөп.
Санатан эттэххэ, сыыппараҕа тэҥэ суох буолууну суох оҥоруу бырагыраамата Арассыыйаҕа Сыыппараҕа министиэристибэтин дьоһун суолталаах үлэлэриттэн биирдэстэринэн буолар. 2021 сылтан Арассыыйаҕа 8,5 тыһыынчаттан тахса аҕыйах киһилээх нэһилиэнньэлээх пуун холбонно.
СӨ Ил Дарханын уонна Бырабыыталыстыбатын пресс-сулууспата