Алтынньы 19-25 күннэригэр СӨ Доруобуйа харыстабылыгар министиэристибэтэ Диспансеризация уонна ыарыыны сэрэтэр чинчийиилэр суолталарын туһунан Бүтүн Арассыыйатааҕы нэдиэлэни ыытыаҕа.
“Хампаанньа сүрүн сыала-соруга — үгүс кутталлаах ыарыыны, ол иһигэр онкология уонна сүрэх-тымыр ыарыыларын, эрдэттэн буллахха, ыарыыны бопсуохха эбэтэр эмтиэххэ сөбүн санатыы.
Өлүү сүрүн төрүөтүнэн буолар сыстыгана суох ыарыылар сыллар тухары туох да сибикитэ суох сайдаллар, ону диспансеризация эбэтэр мэдиссиинэ чинчийиилэрин кэмигэр булуохха сөп.
Иһитиннэрии нэдиэлэтэ – аахсыйа эрэ буолбатах, ол оннугар бэйэ доруобуйатыгар эппиэтинэстээх сыһыаҥҥа бастакы хардыыны оҥорорго төрүөт”, — диэн Доруобуйа харыстабылын министиэристибэтэ иһитиннэрэр.
Ыарыыны сэрэтэр чинчийиилэргэ Арассыыйа олохтооҕо ОМС полиһынан көрдөрүнэр кыахтаах. Үлэлиир нэһилиэнньэҕэ чинчийиини ааһалларыгар төлөнөр өрөбүл күннэрэ көрүллэллэр. Диспансеризация икки түһүмэхтээх. Бастакы түһүмэх сыала-соруга – ыарыылар сайдар сибикилэрин быһаарыы. Иккис түһүмэххэ ыарыыны чопчу быһаарарга эбии чинчийиилэр оҥоһуллаллар.
Диспансеризацияҕа 18-39 саастаахтар — 3 сылга биирдэ, 40 саас кэнниттэн сыл аайы сылдьыахтаахтар.
2026 сыл саҥатыттан Саха сирин 260 тыһыынчаттан тахса олохтооҕо диспансеризацияҕа кытынна. Онуоха 7,5 тыһыынчаттан тахса түбэлтэҕэ ыарыы аан бастаан булулунна.
-Диспансеризацияҕа тиийэргэ олорор сиргинэн поликлиника регистратуратыгар паспордаах уонна ОМС полистаах тиийиллэр;
-“Судаарыстыбаннай өҥөлөр” портал эбэтэр мэдиссиинэ эрэгийиэннээҕи систиэмэлэрин, 122 – Биир кэлим киин нөҥүө суруйтарыллар.
Ыарыыны сэрэтэр тэрээһиннэр дойду бэрэсидьиэнэ Владимир Путин сорудаҕынан “Уһун уонна көхтөөх олох” национальнай бырайыак чэрчитинэн ыытыллаллар.
СӨ Ил Дарханын уонна бырабыыталыстыбатын пресс-сулууспата