РФ Силиэстийэлиир кэмитиэтин Саха сиринээҕи управлениетын Дьокуускайдааҕы силиэстийэлиир отдела 64 саастаах эр киһиэхэ буруйдуур бириигэбэрэ тахсарыгар сөптөөх дакаастабыллары хомуйда. Кини РФ Холуобунай кодексатын 111-с ыстатыйатын 4-с чааһынан (киһи доруобуйатыгар соруйан ыарахан эчэйиини оҥорон, сэрэҕэ суохтан өлүүгэ тиэрдии) буруйдааҕынан ааҕылынна.
Силиэстийэ уонна суут быһаарбыттарынан, бу сыл бэс ыйын 27 күнүн киэһэтигэр Петр Алексеев уулуссатыгар турар дьиэ кыбартыыратыгар дьиэ хаһаайына табаарыһын кытта уһуннук арыгылаабыттар. Ол олорон эр дьон икки ардыларыгар иирсээн тахсыбыт. Дьиэ хаһаайына быһаҕы ылан, ыалдьытын уҥа санныгар анньыбыт.
Бааһырбыт эр киһи подъезка тахсыбыт, ол эрээри хаана баран миэстэтигэр тыына быстыбыт. Өлбүт киһи өлүгүн ыаллара булан, полиция үлэһиттэрин ыҥырбыттар. Түүн кэлбит полицейскайдар кыбартыыра хаһаайынын туппуттар.
«Холуобунай дьыаланан быһылаан хайдах буолбутун чуолкайдыыр уонна дакаастыыр баазаны хомуйар силиэстийэлиир үлэлэр толору ыытылыннылар. Суут уурааҕынан буруйданааччы 7 сылга кытаанах эрэсиимнээх холуонньаҕа көҥүлэ быһылларыгар уураахтанна», — диэн РФ Силиэстийэлиир кэмитиэтин Саха сиринээҕи управлениетын пресс-сулууспата иһитиннэрэр.
