Алтынньы 23 күнүгэр төрдүс төгүлүн ыытыллар «Бастыҥ ювелирнай киэргэллэр» өрөспүүбүлүкэтээҕи быыстапка аһыллыыта буолла.
Бу кэмҥэ саалаҕа Саха сирин бастыҥ ювелирдэрэ, дизайнердара, устудьуоннар, ювелирнэй маҕаһыыннар үлэһиттэрэ — үйэлээх кэрэни айар, чочуйар, дьүһүйэр, тарҕатар талааннаах дьон муһуннулар.
Киириигэ арыылаах алаадьынан, уохтаах кымыһынан айах тутан көрүстүлэр. Саксофон тыыннаах доҕуһуолунан ыалдьыттар мустан бардылар.
Ювелирнай ускуустуба — бу кэрэ көстүү эрэ буолбатах, бу экэниэмикэ, инвестиция, үйэлээх үгэстэр, уран ускуустуба. Хас биирдии оҥоһук — норуот култуурунай »куода». Урбаан миниистирин солбуйааччы Мария Карпова, Ил Түмэн дьокутаата Татьяна Шарова, култуура миниистирин солбуйааччы Мария Турантаева, киин куорат Дууматын дьокутаата Владимир Шиндикиевич Ювелир күнүнэн, быыстапка аһыллыытынан эҕэрдэлээтилэр, ювелир идэтин суолтатын бэлиэтээн туран, судаарыстыбаннай наҕараадалары туттардылар.
Иван Кычкин, »Гохран» судаарыстыбаннай тэрилтэ салайааччыта:
— 30 сыллааҕыта чуо бу күн Саха сиригэр аан бастакы алмаас Сунтаарга чочуллубута. Ол бирилийээн биһиги пуондабытыгар хараллан сытар. Бу быыстапкаҕа ураты оҥоһуктар киирбиттэриттэн, сороҕо биһиги пуондабытыгар, сороҕо чааһынай кэлиэксийэҕэ киириэхтэрэ, — диэн эттэ.
Аныгы үйэҕэ саха киэргэлэ аан дойдуга биллэр бренд буолла. Саха сирин ювелирдара аан дойдутааҕы быыстапкаларга ситиһиилээхтик кытталлар. Быйыл быыстапкаҕа Бурятияттан, Алтаайтан төрүттээх ювелирдар, ураты буочардаах ааптардар, эдэрдэр кыттан, кэрэхсэбиллээх оҥоһуктарын туруордулар.
Художественнай училище устудьуоннара 19-с үйэтээҕи кийиити таҥыннарыы сиэрин-туомун оҥордулар. Бу кинилэр дипломнай үлэлэрэ. Бу быыстапкаҕа устудьуоннар үлэлэрэ эмиэ киирдилэр. Бу төрүт үгэс утумнаһыытын, үүнэр көлүөнэни үөрэтии буолар.
«Оһуор Утум», »Бриллианты Якутии», »Киэргэ» ювелирнай хампаанньалар, »Айар Уустар» креативнай кэллиэс саха таҥаһын, симэҕин, күндү таастаах киэргэллэрин көрдөрдүлэр.
Быыстапка »Сокровищница Якутии» саалатыгар сэтинньи 6 күнүгэр диэри көрдөрүүгэ туруоҕа. Быыстапканы «Сокровищница Якутии» тэрилтэ, »Ювелиры Арктики» ассоциация, Романов аатынан Художественнай училище тэрийдилэр.