Алтынньы 20 күнүгэр Патрис Лумумба аатынан Арассыыйатааҕы норуоттар доҕордоһууларын университетыгар «Мы разные, мы равные» диэн Бүтүн Арассыыйатааҕы бириэмийэни туттарыы буолан ааста. Биһиги өрөспүүбүлүкэбититтэн икки тэрилтэ үрдүк наҕараадаҕа тигистэ.
Ол курдук, Саха Өрөспүүбүлүкэтин Национальнай бибилэтиэкэтэ «Арассыыйа култууратын уонна тылын арааһын харыстааһыҥҥа уонна тарҕатыыга кылаат» номинацияҕа кыайыылааҕынан таҕыста. Билигин бибилэтиэкэ төрөөбүт тыллары харыстааһыҥҥа улахан үлэни ыытар. Кини бырайыактарын ортотугар — Хоту, Сибиир уонна Уһук Илин төрүт олохтоох норуоттарын 40 тылынан матырыйааллары түмпүт «Книгакан» сыыппара бибилэтиэкэтэ баар. Маны таһынан бибилэтиэкэтэ төрөөбүт тылынан кинигэлэри бэчээттээн таһаарар уонна саҥа технологиялары сайыннарар. СӨ Национальнай бибилэтиэкэтэ оҥоһуу өйү туһанар бырайыагар Арассыыйа 25 бибилэтиэкэтэ холбонон үлэлиир.
М.К. Аммосов аатынан ХИФУ Олоҥхо научнай-чинчийэр института «Дойду култууратын баайын харыстааһыҥҥа кылаат» анал аакка бэлиэтэннэ. Институт уһун сыллар тухары биһиги героическай эпоспытын — Олоҥхону үөрэтиинэн уонна харыстааһынынан дьарыктанар. 2016 сылтан манна «Эпосоведение» диэн научнай сурунаалы бэчээттээн таһаараллар.
«Биһиги өрөспүүбүлүкэбитигэр бу наҕараадалар олус улахан суолталаахтар. Тоҕо диэтэххэ, төрөөбүт тыл, литература, үгэстэр уонна Олоҥхо — бу көлүөнэлэри ситимниир, биһиги устуоруйабытын уонна култуурабытын харыстыыр тутаах өйдөбүллэрбит буолаллар. Национальнай бибилэтиэкэтэ уонна Олоҥхо институтун кэлэктииптэрин үрдүк билиниини ылбыттарынан ис сүрэхпиттэн эҕэрдэлиибин! Эһигитинэн киэн туттабыт!, — диэн Култуура миниистирэ Афанасий Ноев соцситимнэргэ биллэрдэ.