Саха сирин ускуустубатыгар бэлиэ түгэн буолла. Алтынньы 26 күнүгэр СӨ Ойуулуур-дьүһүннүүр түмэлигэр Соҕуруу Корея худуоһунньуктара кэлэн, быыстапкаларын арыйдылар.
«K-ART: декоративные декорации» аныгы кэриэй худуоһунньуктарын быыстапкаларын СӨ Тас сибээскэ, норуоттар дьыалаларыгар уонна култуураҕа, духуобунай сайдыыга минситиэристибэлэрин, «АРТСЕВЕРА» ааҕыныстыба, СӨ култууратын сайыннарар пуонда көмөлөрүнэн тэриллибит. Сеуллааҕы Insa Art Plaza Gallery галерея бэрэсидьиэнэ Пак Бок Син уонна 10 худуоһунньук кэлэн, үлэлэрин билиһиннэрэ сылдьаллар.
Быыстапка аһыллыытыгар олус элбэх киһи мустубут: худуоһунньуктар, скульптордар, устудьуоннар, Корея аныгы ускуустубатын сэҥээрээччилэр.
Афанасий Ноев, култуура миниистирэ:
— Элбэх омук олорор өрөспүүбүлүкэтигэр бу олус суолталаах тэрээһин. Быйыл Арассыыйаҕа Норуоттар сомоҕолоһууларын уонна Саха сиригэр Култуура сылын бэлиэтиибит. Култуура кыраныыссаны билиммэт, култуура норуоттары сомоҕолуур. Дьокуускайга уруккуттан Саха-Корея доҕордоһуутун ассоциацията үлэлиир, Саха-Корейскай оскуола баар. Саха сирин салалтата аан дойдутааҕы сибээһи бөҕөргөтөр үлэни куруук өйүүр. Култуура сылыгар маннык сибээс бөҕөргүүрэ ордук үөрдэр. Култуура нөҥүө дойду устуоруйатын, духуобунаһын эмиэ билэбит. Ыалдьыттарбыт биһиги худуоһунньуктарбытын кытта билсэн-көрсөн, бигэ сибээһи олохтуохтара диэн эрэнэбин, — диэн эттэ.
СӨ тас сибээскэ, норуоттар сибээстэригэр миниистирин солбуйааччы Зинаида Сергеева:
— Биһиги дойдуларбытын дириҥ ытыктабылга олоҕурбут, өр сыллаах доҕордоһуу ситимниир. Корея худуоһунньуктарын үлэлэрэ биһиэхэ норуот ис эйгэтин арыйаллар. Төһө да ыраах олордорбут, биһиги ситимнэһэр туочукалардаахпыт. Быыстапка болҕомтону ылан, киэҥ араҥаҕа интэриэһи тардыа диэн эрэллээхпин, — диэтэ.
Пан Бок Син, арт-галерея бэрэсидьиэнэ, быыстапканы тэрийээччи:
— Быыстапка кэлэригэр, турарыгар көмөлөспүт дьоҥҥо улахан махталбын, ытыктабылбын тиэрдэбин. 2019 сыллаахха Дьокуускайга кэлэн, Ойуулуур-дьүһүннүүр түмэлгэ сылдьан, Саха сирин култууратын, ускуустубатын кытта билсэн, ыалдьытымсахтарыттан сөҕөн барбытым. Ол иһин маннык кыттыгас үлэни ыытыахпын баҕарбытым ыраатта. Санаабытыгар, ыраах да ыраах, өр да өр айаннаан кэллибит. Бу кэриэйдэр аан дойдуну анаарыыларын көрдөрөр, духуобунай ис эйгэлэрин арыйар, араас хайысхаларынан ис туруктарын тиэрдэр үлэлэрэ. Аан дойдуга кэриэй култуурата киэҥник тарҕана, биһирэнэ турар кэмигэр Саха сиригэр кэлбиппит мээнэҕэ буолбатах. Инникитин да бииргэ үлэлэһиэхпит. Саха худуоһунньуктара эмиэ Кореяҕа кэлэн быыстапкалыылларын баҕарабыт, — диэн эттэ.
Хан Сук, Арт-галерея дириэктэрэ:
— Манна кэлэрбитигэр олус долгуйбуппут, тоҕо диэтэр, Арассыыйаҕа аан бастаан үктэннибит. Аэропорка олус уратытык көрсүөхтэриттэн, сахалар ыалдьытымсахтарын, сылаас сүрэхтээхтэрин итэҕэйдибит. Саха култууратын, үгэстэрин кытта билистибит. Саха худуоһунньуктарын маастарыстыбалара үрдүгүн бэлиэтиибит. Бу быыстапка көмөтүнэн, өссө саҥа саҕахтар, аартыктар арыллыахтара диэн эрэнэбин. Биһиги галереябыт аатыттан Саха сирин кытта сибээстээх бырайыактары куруук өйүөхпүт диэн эрэннэрэбин, — диэн бэлиэтээтэ.
Дора Балданова, Саха сирин култууратын сайыннарар пуонда толорооччу дириэктэрэ:
— Корея дэлэгээссийэтигэр худуоһунньуктар эрэ буолбакка, хас да галерея үлэһиттэрэ кэлбиттэрэ үөрдэр. Бииргэ үлэлэһии саха худуоһунньуктара аан дойду эйгэтигэр тахсалларыгар төһүү күүс буолуоҕа, — диэн эттэ.
Бу кэнниттэн биир кэрэхсэбиллээх бэлиэ түгэн буолла. Кэриэй худуоһунньуктара түмэлгэ бэйэлэрин хартыыналарын бэлэхтээтилэр. Кинилэр национальнай таҥастарын таҥнан-симэнэн кэлбиттэрэ олус үчүгэйдик көстөр. Кыргыттар тобуктаан олорон, сүүстэринэн сири аҕаан, бокулуоннаан ылбыттара дьону сөхтөрдө. Бу кинилэр махталларын, дириҥ ытыктабылларын көрдөрөр төрүт үгэстэрэ эбит.
Влада Тимофеева, Ойуулуур-дьүһүннүүр түмэл дириэктэрэ:
— Билигин аан дойду үрдүнэн Азия дойдуларын култуурата улахан интэриэһи тардаллар. Манна Соҕуруу Корея ойуччу турар. Маны тэҥэ, дьоҕус эрээри, омук быһыытынан уратылаах култуураларга интэриэс баар. Онон Саха сирин култуурата, ускуустубата аан дойдуга тахсар кыахтаах. Кореяттан 11 худуоһунньук анаан кэлэн, бэйэлэринэн билиһиннэрэ сылдьаллара биһиэхэ чиэс, — диэн туран, салайааччыга саха хомуһун, хас биирдиилэригэр үрүҥ көмүс харысхалы бэлэхтээтэ.
Быыстапка түмүгүнэн, Сеуллааҕы Insa Art Plaza Gallery галерея уонна Ойуулуур-дьүһүннүүр түмэл бииргэ үлэлэһэргэ сөбүлэһии түһэрсиэхтэрэ.
Бу кэнниттэн мустубут дьону быыстапканы көрөргө ыҥырдылар. Саха-Корейскай оскуола оҕолоро кэриэйдии таҥнан, национальнай барабааннарынан доргуччу оонньоон, ураты турукка киллэрдилэр. Үс улахан саала тухары хартыыналар хас биирдиилэрэ анал уотунан сырдатыллан, ыраахтан сырдаан көстөллөр. Түҥ былыргы үгэстэртэн, буддизмтан, минхва норуодунай ойууттан тирэхтэнэн, аныгылыы поп-арт истиилгэ тиийэ — ураты көрүүлээх, интэриэһинэй үлэлэр бааллар.
«K-ART: декоративные декорации» аныгы кэриэй худуоһунньуктарын быыстапкалара алтынньы 28 күнүттэн сэтинньи 29 күнүгэр диэри Ойуулуур-дьүһүннүүр түмэлгэ туруоҕа. Соҕуруу Корея култууратын интэриэһиргиир ыччакка Пушкин каартата үлэлиир. Онон аан дойдуну умсугуппут кэриэй култууратын, аныгы ускуустубатын илэ кэлэн көрөргүтүгэр ыҥырабыт.