Саха сиригэр 50-тан үөһэ саастаах олохтоохтор урбааҥҥа баҕа санааларын өйүүр сыаллаах «Серебряный старт|14» диэн үөрэх бырагыраамата саҕаланна. Күрэх түмүгүнэн Дьокуускай куораттан уонна араас улуустартан 20 кыттааччы талыллан, биисинэһи салайыыга үөрэнэр уонна бэйэлэрин дьыалаларын арыйарга эбэтэр сайыннарарга 150 тыһыынча солкуобай суумалаах грант иһин күрэхтэһэр кыахтаннылар.
Саха сиригэр дьоҕус уонна орто биисинэһи өйөөһүн Арассыыйа Бэрэсидьиэнэ Владимир Путин көҕүлээбит «Көдьүүстээх уонна күрэстэһэр экэниэмикэ» национальнай бырайыак чэрчитинэн ыытыллар.
«Аҕа саастаах дьоҥҥо бэйэлэрин талааннарын уонна санааларын олоххо киллэрэллэригэр дьиҥнээх кыах буолар. Дьон сэҥээриитэ улаханын көрөбүт: 100-тэн тахса киһи сайаапка биэрдэ. Бу биһиги эрэгийиэммит экэниэмикэтигэр кылааттарын киллэрэр, бэйэлэрин биисинэстэрин арыйар баҕалаах көхтөөх, талааннаах дьон элбэҕин туоһулуур», — диэн Саха Өрөспүүбүлүкэтин урбааҥҥа, эргиэҥҥэ уонна туризмҥа миниистирэ Георгий Андреев бэлиэтээтэ. Өрөспүүбүлүкэ үрдүнэн киирбит 117 сайаапкаттан эспиэрдиир хамыыһыйа 20 саамай кэскиллээх биисинэһи талан ылла. Кинилэр билигин күнүскү үөрэххэ киирдилэр.
Бырайыак биир кыттыылааҕынан Марфа Иванова буолла. Кини биэнсийэҕэ тахсан баран, бэйэтин урбааҥҥа холонон көрөргө быһаарыммыт. Кини тымныы ньыманан ыгыллыбыт арыыны оҥорор санаалаах.
«Мин үйэм тухары тэрилтэҕэ үлэлээбитим, ону тэҥэ ыҥырыа иитиитинэн дьарыктанар кэргэммэр көмөлөһөрүм. Соторутааҕыта босхолонон, сынньалаҥҥа таҕыстым. Билигин тымныы ньыманан ыгыллыбыт арыыны оҥоруунан дьарыктаныахпын баҕарабын. Ол иһин биисинэһи хайдах салайар бары кисэлэҥнэрин билиэхпин баҕарабын: дьыаланы хайдах сөпкө докумуоннаһарга, атыылаһааччылары хантан көрдүүргэ, айылҕа бородууктатын атыылыырга ханнык докумуоннар наадаларын», — диэн Марфа Иванова кэпсээтэ.
Дьон киллэрбит этиилэрэ урбаан араас хайысхаларын хабаллар. Ол иһигэр – сахалыы тылынан оҕо кинигэлэрин таһаарыы, аҕа саастаах дьоҥҥо йога дьарыгын тэрийии, полиграфия өҥөтүн оҥоруу, оҥоһуу өйү туһанан видео-контент оҥорор креативнай устуудьуйаны сайыннарыы, иис оскуолатын арыйыы, саха сылгытын этиттэн бородууксуйа оҥоруу уонна сахалыы таҥаһы тигии бааллар.
Бырагыраама түмүктүүр түһүмэҕинэн алтынньы 30 күнүгэр эспиэрдиир хамыыһыйатын иннигэр биисинэс-бырайыактары көмүскээһин буолуоҕа. Түмүгүнэн бэйэтин дьыалатын олоххо киллэрэригэр 150 тыһыынча солкуобай суумалаах граны ылар кыайыылаах быһаарыллыаҕа.
Бырагырааманы Саха Өрөспүүбүлүкэтин Урбааҥҥа, эргиэҥҥэ уонна туризмҥа министиэриистибэтин иһинэн үлэлиир «Мой бизнес» киин тэрийэр. Сүрүн партнёр — Саха Өрөспүүбүлүкэтин Мэктиэлээһин пуондата. Урбаанньыттар судаарыстыба өйөбүлүн, күрэхтэр, быыстапкалар уонна үөрэтэр тэрээһиннэр тустарынан сиһилии информацияны Мойбизнес14.рф порталга, «Мой бизнес» киин социальнай ситимнэригэр, ону таһынан 8 (800) 100-58-80 итии линия төлөпүөнүнэн билсиэхтэрин сөп.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата