Аан Алахчын Хотун — Айыылартан биирдэстэрэ. Кини аата элбэх. Сороҕор Күөгэл Хотун, Иһэгэй Хотун дииллэр. Аан Алахчын үксүн аар хатыҥ маска олорор. Атын мастарга, кэрэ томторго, тумулга эмиэ олоруон сөп. Кини нүөл эттээх-сииннээх дьахтар буолан көстөр. Сороҕор сир-дойду алдьаннаҕына-кээһэннэҕинэ, аас баттахтаах эмээхсин буолан түүлгэ көстөр, ытыыр, соҥуур.
Аан Алахчын үүнээйилэри, кыыллары, көтөрдөрү араҥаччылыыр. Кини Иэйиэхсит күүһүн айылҕаҕа биэрэр. Алахчын олорор сирэ ытык сир буолар. Кини Эрэкэ-дьэрэкэ оҕолордоох. Аан Алахчын киһиэхэ киирэн, киһини оту-маһы, кыылы-көтөрү, үөнү-көйүүрү кытта сибээстиир. Киһини көрө-истэ, араҥаччылыы сылдьар, дьоҥҥо чугас. Куһаҕан майгыттан, быһыыттан кэлэйэр, киэр хайыһар. Онон аламаҕай Айыыбытыгар сүгүрүйэ, үҥэ-сүктэ сылдьыахтаахпыт.
Аан Алахчыҥҥа анаан ыам ыйыгар, бэс ыйын саҕаланыытыгар салама ыйааһынын туома ыытыллар. Бэс ыйын бастакы аҥаарыгар Эрэкэ-дьэрэкэ оҕолорго анаан Туҥуй кымыс ыһыаҕа буолар.
Анал сиргэ, хатыҥ чараҥҥа Аан Алахчын Хотуҥҥа сүгүрүйэр сиэр-туом толоруллар. Бастаан алгысчыт уот оттон, уот иччитэ Хатан Тэмиэрийэҕэ, онтон сир-дойду иччитэ Аан Алахчын Хотуҥҥа махтанар алгыс тылларын этэр, арыылаах алаадьынан айах тутар. Ол кэнниттэн хотун дьахталлар ыллыы-ыллыы хатыҥ мастарга уйгу-быйаҥ бэлиэтин, саламаны ыйыыллар.
Алгыһа:
Нарын-наскыл, нарыл-наскыл, нарыл-наскыл!
Үүнэри төрүттээччи,
Быйаҥы биэрээччи,
От анныгар обугунаспыт
Ойуу-бичик уолаттардаах,
Сэбирдэх быыһыгар сибигинэспит
Ойуу-бичик кыргыттардаах,
Үүс кыыл тириитэ бэргэһэтин
Эҕэтэйдии кэппит,
Киис кыыл тириитэ саҕынньаҕын
Нэлэккэйдии кэппит,
Баһыы көмүс тарбахтаах,
Көҕүөр-таһыар эмиийдээх,
Күскэм-тускул,
Айхал-мичил,
Аан Алахчын
Хотун ийэбит,
Бэттэх көрөн
Мичик гын!
Дом!