Арктикатааҕы судаарыстыбаннай ускуустуба, култуура уонна креативнай индустрия үнүбэрсиэтэ «Айар индустрияны салайар магистр» идэлээх бэлэмнэнии бырагырааматын иккис бөлөҕүн саҕалаата. СӨ Ил Дарханын иһинэн үлэлиир Инновационнай менеджмент үрдүкү оскуолатын кытта бииргэ олоххо киирэр бырайыак өрөспүүбүлүкэ айар экэниэмикэтин салайааччыларыгар көдьүүстээх үөрэх былаһаакката буоларын дакаастаата.
Тэрээһини арыйан туран, СӨ инновацияҕа, цифровой сайдыыга уонна инфокоммуникационнай технологияларга миниистирэ Пётр Николаев бырагыраама өрөспүүбүлүкэ баһылыга Айсен Николаев «Айар экэниэмикэни сайыннарыы туһунан» ыйааҕар туруорбут соругун толорор сыаллааҕын тоһоҕолоото.
«Биһиэхэ саҥа таһымнаах салайааччылар наадалар — айар эйгэни бөҕөргөтөр кыахтаах салайааччылар, — диэн миниистир биллэрдэ. — Тоҕо диэтэххэ, айар экэниэмикэ – биһиги өрөспүүбүлүкэбит инникитэ».
АГУИККИ ректора Саргылана Игнатьева үөрэтии Уһук Илин бастакы уонна айар салааларга идэтийбит соҕотох үнүбэрсиэтэ буоларын аҕынна. Кини иккис бөлөх үөрэҕэ, үгэс быһыытынан, мантан саҕаланара үтүө бэлиэ буоларын бэлиэтээтэ, биллэрин курдук, үйэ чиэппэрин устата биллэр киинэ уонна тыйаатыр артыыстара, култуура уус-уран салайааччылара үөрэнэллэр.
Бырагыраама туһалааҕын сүрүн дакаастабылынан выпускниктар олоххо киллэрбит дьыалалара буолаллар. Ректор икки сөхтөрөр холобуру аҕалла: Горнай улууһуттан номнуо үбүлээһини ылбыт туристическай стартап уонна бүтүн оройуону сайыннарар кыахтаах Чурапчы улууһугар «9 Томтор» бырайыак. «Бырагырааматтан тыа сирин экэниэмикэтин сайыннарар салайааччылар тахсаллар », — диэн Саргылаана Игнатьева түмүктээтэ.
ВШИМ сайдыытын дириэктэрэ Иннокентий Ксенофонтов бу сыаллары ситиһэргэ тустаах инструменнары билиһиннэрдэ. Кини иккис бөлөх тутулун сиһилии кэпсээтэ: алта модуль (көрсүһүү уонна тэйиччиттэн), федеральнай уонна эрэгийиэннээҕи былаас уорганнарын кытта алтыһыытын, ыам ыйыгар Чурапчы улууһугар экскурсияны.
«Сүрүн сыал-сорук дьиҥнээх, олоххо киирэр бырайыактары оҥоруу буолар. Иккис бөлөх выпускниктара аан бастакынан институт дипломун буолбакка, үнүбэрсиэт дипломун ылыахтара, бу АГУИККИ саҥардыллыбыт статуһугар сөп түбэһэр,»— диэн тоһоҕолоон бэлиэтээтэ.
СӨ инновацияҕа, сыыппара сайдыытыгар уонна инфокоммуникационнай технологияларга миниистирин солбуйааччы Николай Потапов саҥа үөскээн эрэр бырайыактары баар инфраструктураҕа хайдах киллэриэххэ сөбүн быһаарда. Кини Саха сирин Арассыыйа айар индустриятын төрүттэммит дойдута диэн ааттаата уонна баар өйөбүл платформаларын ааттаата: АйТи-парк, «Якутия» Технопарк , «Квартал труда» кластер , Саха сирин сайыннарар корпорация, уо.д.а. «Бу инструменнар бары эһиэхэ аһаҕастар», — диэн кыттааччыларга эрэннэрдэ.
Бастакы кууруһу бүтэрбит Диана Васильева бырагыраама идиэйэлэри материальнай баайга кубулутарга төһө көдьүүстээхтик көмөлөһөрүн чаҕылхайдык көрдөрдө. Бырагыраама иннинэ концепция быһыытынан эрэ баар эрээри, билигин дойду инвестиционнай бырайыактарын испииһэгэр киирэн эрэр «Тыын» диэн бырайыагын билиһиннэрдэ. «Саҥа саҕалыыр дьоҥҥо кыратык ымсыырабын», — Диана билинэр. «Бырагыраама миэхэ идиэйэбин олоххо киллэрэргэ туох наадалааҕын барытын биэрбитэ. Хорсуннук толкуйдаа, улахан ыра санаалан — барыта билии уонна биир санаалаах дьон түмсүүтүнэн кыаллар.»