Амма улууһун А.П.Рязанскай аатынан Соморсун орто оскуолатыгар үөрэх эйгэтигэр биир сүрүн тэрээһин буолан ааста – “Эдэр учуутал-2026” идэ күөн күрэһин улуустааҕы түһүмэҕэ.
Бастыҥ аатын ылар туһугар улуус араас оскуолаларыттан 15 эдэр педагог кытынна. Кинилэр бары эдэр исписэлиистэр, сорохтор үрдүк үөрэх кыһатын кэнниттэн бастакы сылларын үлэлииллэр.
Күөн күрэс сүрүн биридимиэттэри барытын хабар хас даҕаны номинациянан барда: уопсастыбаннай билим, айылҕа үөрэҕин билимэ, политиэхиньиическэй билим, гуманитарнай билим, алын кылаас учууталлара.
Бырагыраамаҕа мэтэдиическэй портфолионы билиһиннэрииттэн саҕалаан аһаҕас уруоктары ыытыыга, үөрэнээччилэри кытта сэһэргэһиигэ тиийэ хас даҕаны түһүмэх киирэр. Эппиэтинэс улахан этэ эрээри, бу, тэрээһин чахчы истиҥник ааһарыгар харгыс буолбата. Сорох түгэннэргэ күөн күрэс да буола турарын умнан, кытаанах дьүүллүүр сүбэ уонна бэйэ икки ардыгар күрэстэһии оннугар, уопуттаах биир идэлээхтэр өйөбүллэрэ, кыттааччылар бэйэ-бэйэлэрин үлэлэрин сэҥээрии баара бэлиэтэннэ.
“Илин эҥээр-2026” үөрэх уокуругун эдэр учуутала” күөн күрэс улуустааҕы түһүмэҕин муҥутуур кыайыылааҕынан Чакыр орто оскуолатын информатикаҕа учуутала Уйгулаана Семеновна Варламова ааттанна.
Уйгулаана Варламова – В.Г.Короленко аатынан Амма 1-кы нүөмэрдээх оскуолатын, салгыы М.К.Аммосов аатынан Хотугулуу-Илиҥҥи федеральнай университет физика-тиэхиньиическэй институтун бүтэрбитэ.
— Учуутал – бу, бастатан туран, эппиэтинэс. Оҕолор билиилэригэр эрэ буолбакка, кинилэр киһи быһыытынан сайдыыларыгар эмиэ. Мэлдьи өйдүүбүн: миигин көрөллөр, кэтииллэр, мин үөрэнээччилэрбэр холобур буолабын. Бэйэм билиибин оҕолору кытта үллэстэрбиттэн, сэҥээрэн харахтара чаҕылыһа тыгарыттан үөрэбин, — диэн Уйгулаана Семеновна кэпсиир.
Педагог үөрэҕи таһынан “АйТи устуудьуйа” куруһуогун ыытар. Онно айар олох оргуйа олорор: оҕолору кытта сувенир оҥороллор – иһиккэ, таҥаска ойуу, ойуу-бичик түһэрэллэр, бэйэлэрэ толкуйдаан магниттары оҥороллор, лазернай быһыы сатабылларыгар үөрэнэллэр.
— Үөрэнээччилэрим кыайдахтарына-хоттохторуна олус үөрэбин. “Мин идэм — АйТи” улуустааҕы күөн күрэскэ биһиги иккис миэстэни ылбыппыт. Оттон “Биисинэс-инкубатор” бырайыакпыт өрөспүүбүлүкэ таһымыгар I истиэпэннээх дьупулуомунан бэлиэтэммитэ, — диэн педагог санаатын үллэстэр.
Тыа сирин оскуолата нэһилиэк олоҕун киининэн, оргуйар үөһүнэн буолар диэн Уйгулаана Семеновна этэр.
Биһиэхэ оскуола, оҕолор, төрөппүттэр – ситимнээх биир улахан ыал курдук. Дьон бэйэ-бэйэтигэр болҕомтолоохтук сыһыаннаһар, аламаҕай. Чуҥкуйан олорорго иллэҥ да суох, уруок кэнниттэн успуорт, волейбол, оннооҕор буулдьанан ытыынан умсугуйабыт, күрэхтэһэбит, — диэн кини кэпсиир.
Бу буолан ааспыт идэ күөн күрэһин эдэр педагог долгутуулаах түгэн диэн бэлиэтиир, оттон кыайыытын – улахан эппиэтинэс.
— Олус долгутуулаах этэ. Оскуолам аатын-суолун көмүскүүр буолан, кэннибэр кэлэктиибим барыта турарын билэрим. Биир идэлээхтэрим миигин өйүү кэлбиттэрэ, саалаҕа олорбуттара. Онон күүспэр күүс эбиллибит курдук этэ. Кыайыы диэн бу аҥардастыы үөрүү эрэ буолбатах, толоруллуохтаах, итэҕэтиллиэхтээх улахан эппиэтинэс буолар, — диэн муҥутуур кыайыылаах эрэллээхтик түмүктүүр.
Бу туһунан Амма улууһун үөрэҕин управлениета сырдатар.
