Классическай сливочнай пломбир уонна айылҕа загустителларыттан оҥоһуллубут фруктовай сорбет — доруобуйаҕа ордук туһалаах мороженайдар ахсааннарыгар киирэллэр. Ол эрээри, кинилэр калорийдаах уонна тымныйар кутталы үөскэтэр буоланнар, куйааска наһаа элбэҕи сиэмиэххэ наада. Бу туһунан ТАСС-ка Москваҕ 220 №-дээх куорат поликлиникатын кылаабынай бырааһа Анна Косенкова иһитиннэрдэ.
«Мороженай бары көрүҥнэриттэн классическай пломбир ордук сөптөөх састааптаах. Манна натуральнай сыа, белок уонна фруктовай мууска тэҥнээтэххэ, саахар аҕыйах».
«Пектин эбэтэр агар-агар загустителлээх фруктовай сорбеты эмиэ туһалаахха киллэриэххэ сөп. Бу лактозаны тулуйбат дьоҥҥо барсар», — диэн Косенкова бэлиэтээтэ.
Мороженай састаабыгар бастакынан үүт эбэтэр үүт сыата (сливки), ынах арыыта, сухуой үүт бородууксуйата, натуральнай загустителлар (агар-агар, пектин), ону тэҥэ натуральнай ароматизатордар (ваниль, шоколад, отон) киириэхтээхтэр.
«Үүнээйи сыатын (пальма, кокос арыыта) уонна уһун Е-эбииликтэр испииһэктэрин, стабилизатордары, глюкозно-фруктознай сиропу, искусственай кырааскалары оҥорор бородууксуйаны ылымаҥ. Оччоҕо бу мороженай буолбакка, үүт сыатын солбуйааччылаах үүт бородууксуйата буолар», — диэн кэпсэтээччи бэлиэтээтэ.
Уопсайынан, быраастар мороженайы үчүгэйдик сыаналыыллар, тоҕо диэтэххэ, манна кальций уонна белок баар, ону тэҥэ, чэпчэкитик иҥэр углеводтар уонна серотонин таһымын үрдэтии түмүгэр, минньигэһи аһаан баран, сэниэлэнэн, настарыанньа тупсуон сөп. Куйааска бу десерт киһи эти-сиини итийииттэн харыстыыр. Ол гынан баран, мороженайы таларгытыгар калорийын уонна иһигэр баар саахарын ахсаанын учуоттуур наада. Ол иһин, элбэх саахардаах, кырааскалаах фруктовай мууһу уонна веганскай мороженайы (кокос/миндаль үүтүттэн оҥоһуллубуту) сиири сүбэлээбэттэр.
Элбэх сыалаах мороженайдар үөс уонна ноор ыарыылаахтарга кутталлаахтар.