Росстандарт тирии оҥоһуктарга — суумкаларга, бартыбыалларга, чымадааннарга, паапкаларга уонна да атын малларга ГОСТ ылыммытын туһунан, РИА Новости ааҕыныстыба биэдэмистибэ электроннай баазатын үөрэтэн баран билбит.
Онон, суумкалар тигиилэрин, тутаахтарын уонна санныга кэтэр быаларын бөҕө-таҕа буолууларыгар ирдэбил олохтоммут.
Бэлиэтэммитинэн, оҥоһуктар аһаҕас тигиилэрин иһинээҕи быһа охсуулара окантовканан сабыллыахтаахтар эбэтэр обметочнай строчканан оҥоһуллуохтаахтар. Быһа охсуу кытыылара сиигирбэт буолуохтаахтар. Бартыбыалларга тимир пластиналар кистэммит буолуохтаахтар.
Докумуоҥҥа ыйылларынан, дьахтар күннээҕи суумкаларын уонна үрүсээктэрин биир эбэтэр икки ис сиэптээх оҥоруохтаахтар. Оттон 20 см-тан уһуна суох эдэр дьон уонна киэргэл суумкаларыгар ис сиэп суох буолуон сөп.
Чымадааннарга иһигэр хайаан да биир сиэп баар буолуохтаах. Чымадаан хаппаҕын уонна куорпуһун икки ардыгар хайаҕас 4 миллиметртэн улахан буолуо суохтаах. Оттон натуральнай тирииттэн оҥоһуллубут чымадааннар подкладкалаах буолуохтаахтар.
Маны таһынан, суумкаларга, бартыбыалларга уонна да атын оҥоһуктарга хайа тардыы уонна бээтинэ суох буолуохтаах.
«Оҥоһуктары маннык ньымаларынан оҥороллор: тигии (сабыынан эбэтэр продержканан), килиэйдээһин, сварка (үрдүк частоталаах токтарынан), заклепкалааһын, өргөнөн оҥоруу, баайыы, өрүү, формалааһын, кутуу, комбинированнай уонна да атын. Оҥоһук куорпуһун сүгэр тигиилэрэ, тутаахтара уонна санныга кэтэр быалара статическай ноҕуруускаҕа бөҕө буолуулара ирдэбилгэ эппиэттиэхтээх», — диэн докумуоҥҥа түмүктээн суруллубут.
ГОСТ 2027 сыл кулун тутар 1 күнүттэн күүһүгэр киириэҕэ.