Дьокуускайга «Мир! Май! ГТО!» өрөспүүбүлүкэтээҕи бэстибээлгэ эдэрдиин-эмэнниин көхтөөхтүк кытыннылар.
Бу туһунан эрэгийиэннээҕи ГТО киинин салайааччыта Ариян Александров маннык сырдатта:
— Суолталаах тэрээһиҥҥэ 5 тыһыынчаттан тахса киһи кыттыыны ылла. Өрөспүүбүлүкэ Бырабыыталыстыбатын Бэрэссэдээтэлин солбуйааччы Анатолий Семенов бастыҥнарга ГТО кыһыл көмүс бэлиэлэрин туттарда. Биир кэлим нормативтары туттарыы «Туймаада» стадиоҥҥа, Култуура уонна сынньалаҥ киинигэр (ЦПКиО) уонна «Чолбон» сөтүө комплексын базатыгар буолла. Күрэхтэһии кэмигэр кыттаачыларга анаан «Доруобуйа дьаарбаҥката» үлэлээтэ.
Тэрээһиҥҥэ араас көлүөнэ дьон көхтөөхтүк кыттан, күүстэрин-уохтарын тургуттулар.
Дмитрий Устинов («Якутскэнерго» тэрилтэ маастара) ГТО нормативтарын аан бастаан туттаран, тута кыһыл көмүс бэлиэни ылла.
Лена Ефимова (Аэропорт үлэһитэ, 36 саастаах) “ГТО-ну туйгуннук туттарыы оҕолорго уонна атыттарга үтүө холобур буолар” диэн бэлиэтээтэ.
Евдокимовтар дьиэ кэргэн (Мария Алексеевна — 71, Павел Павлович — 72 саастаахтар) дьиэлэригэр иккиэн кыһыл көмүс бэлиэни ылан бардылар. Бу ыалы саас ылбат дьоно эбит. Иккиэн чэгиэн-чэбдик буолуу суолтатын өйдүүллэрин уонна күрэхтэһээччи ахсаана элбиириттэн үөрэллэрин биллэрдилэр.
Егор Старков (кроссфит тириэньэрэ, 25 саастаах) оскуола эрдэҕиттэн утумнаахтык ГТО-ну туттарар уонна өрүү кыһыл көмүс бэлиэни ылар эбит. Ол кини тас көрүҥэр да көстөр.
Үс күн устата судьуйалар уонна волонтердар улахан эппиэтинэстээхтик уонна бэриниилээхтик үлэлээн, күрэхтэһии таһымын үрдэтэн, тэрээһин өрө көтөҕүллүүлээхтик ааһан, дьон санаата кэллэ.