Үлэлиир биэнсийэлээхтэр сыл аайы биэнсийэлэрин хос ааҕылларын атырдьах ыйын 1 күнүгэр оҥоруохтара. Бу туһунан ТАСС иһитиннэрдэ.
Плеханов аатынан РЭУ судаарыстыбаннай уонна муниципальнай үп кафедратын бэрэпиэссэрэ Юлия Финогенова ааҕыныстыбаҕа кэпсэтиитигэр эрдэ бэлиэтээбитинэн, атырдьах ыйын 1 күнүттэн страховой биэнсийэлэри хос ааҕыахтара, оттон алтынньы 1 күнүттэн — байыаннай биэнсийэлээхтэргэ индексациялыахтара.
Страховой биэнсийэлэри, ол иһигэр үлэлиир биэнсийэлээхтэргэ, тохсунньу 1 күнүттэн номнуо индексациялаабыттара — оччолорго 7,6% үрдэппиттэрэ.
Аны инфляция таһымынан уонна былааннанар хамнас үүнүүтүнэн сылга иккитэ — олунньу 1 күнүттэн уонна муус устар 1 күнүттэн — оҥоһуллуоҕа. Бу иннинэ Үлэ министиэристибэтэ 2027 сыл тохсунньу 1 күнүттэн сааһынан страховой биэнсийэни сайабылыанньата суох аныырга этии киллэрбитэ. Судаарыстыбаннай Дуума бүддьүөккэ уонна нолуокка кэмитиэтин чилиэнэ Никита Чаплин «Парламентская газета» хаһыакка быһаарбытынан, билигин сааһынан биэнсийэни анаттаран ыларга Социальнай пуондаҕа — быһаччы тэрилтэҕэ бэйэтигэр эбэтэр «Госуслуги» уонна МФЦ нөҥүө — сайабылыанньа биэриэххэ наада.
Дьокутаат этэринэн, ити наадата суох бюрократическай мэһэйдэри үөскэтэр. Саҥа ньыма быһыытынан, киһиэхэ сааһынан страховой биэнсийэ бырааба үөскээтэҕинэ аптамаатынан ананыахтаах, диэн Чаплин бэлиэтиир.