Саха Өрөспүүбүлүкэтин физическэй култуураҕа уонна успуорка миниистирэ Леонид Спиридонов Йошкар-Олаҕа ыытыллыбыт Арассыыйа чөмпүйэнээтигэр үрдүк ситиһиилээхтик кыттыбыт, пауэрлифтиҥҥэ Арассыыйа чөмпүйүөнүн уонна рекордсменын Богдан Прокопьевы кытта көрүстэ.
СӨ Успуорка министиэристибэтин пресс-сулууспата иһитиннэрбитинэн, күрэхтэһии түмүгүнэн күрэсчит 120 киилэҕэ диэри ыйааһыҥҥа эр дьоҥҥо классическай троеборьеҕа кыһыл көмүс мэтээли ылла, үс эрчиллии түмүгүнэн 866 кг көрдөрөн үрдүк ситиһиини олохтоото (348,5 кг ыйааһыннаах штангалаах олоруу, 187,5 кг сытан анньыы уонна 330 кг становай көтөҕүү).
Миниистир күрэсчити үрдүк ситиһиитинэн эҕэрдэлээтэ уонна кини күүс көрүҥнэрин сайыннарыыга уонна ыччат ортотугар пауэрлифтины тарҕатыыга кылаатын бэлиэтээтэ. Ситиһиилэрин уонна өрөспүүбүлүкэни Бүтүн Арассыыйатааҕы таһымҥа чиэстээхтик көрдөрбүтүн иһин Леонид Николаевич күрэсчиккэ миниистир Махтал суругун туттарда.
«Богдан биһиги өрөспүүбүлүкэбититтэн Арассыыа иккис рекордсменынан буолла. Саха күрэсчиттэрэ маннык үрдүк ситиһиилэри уустук көрүҥнэргэ ситиһэллэрэ ордук суолталаах. Урут суукка устата сүүрүүгэ Александр Моедо Арассыыйа чөмпүйүөнэ уонна рекордсмена буолбута, оттон бүгүн пауэрлифтиҥҥэ Богдан Прокопьев үрдүк көрдөрүүнү ситистэ. Бу биһиги күрэсчиттэрбит бэлэмнэрин үрдүк таһымын, дьулуурдарын уонна санааларын күүһүн туоһулуур. Богдаҥҥа ситиһиитигэр тохтообокко, аан дойдутааҕы аренаҕа саҥа үрдүктэри дабайарыгар баҕарабын», – диэн Леонид Николаевич бэлиэтээтэ.
Билигин спортсмен ахсынньыга Монголияҕа ыытыллар Азия чөмпүйэнээтигэр бэлэмнэниини саҕалаата. Богдан былааныгар көрдөрүүтүн 14 киилэнэн тупсаран, Арассыыйа аан дойду кылаастаах успордун маастарын нуорматын толоруу күүтэр.