Дьокуускай куораты өрөспүүбүлүкэ улуустарыгар уонна чугас сытар эрэгийиэннэргэ тарҕаммыт ойуур баһаардарын буруота бүрүйдэ. УГМС саайта сабаҕалыырынан, кэлэр сууккаҕа салгын туруга өссө мөлтүүрэ күүтүллэр.
Бу кэмҥэ доруобуйабытын хайдах харыстанабыт?
Исписэлиистэр буруо кэмигэр маннык харыстанар дьаһаллары тутуһарга сүбэлииллэр:
- оҕолор уонна хат дьахталлар кыаллар буоллаҕына таһырдьа тахсыбаттара ордук;
- дьиэ уонна офис түннүктэрин сабыылаах тутуҥ, ордук түүн уонна сарсыарда эрдэ (бу кэмҥэ салгыҥҥа буортулаах эттиктэр муҥутуурдук мунньуллаллар);
- түннүгү аһар буоллаххытына, инчэҕэй маарыланан эбэтэр чараас таҥаһынан бүрүйүҥ;
- таһырдьа элбэхтик хамсанары, успуордунан дьарыктанары тохтотуҥ (физическэй ноҕуруусканы кыччатыҥ);
- хойуу буруоҕа маасканы эбэтэр респираторы кэтиҥ, салгыны үчүгэйдик ыраастыырын туһугар мааскаҕытын уунан кыратык сиигирдэн биэриҥ;
- сүрэх, тыҥа хроническай ыарыылаах дьон быраас анаабыт эмтэрин тохтотумаҥ, дозатын кыччаппакка иһиэхтээхтэр. Туруккут мөлтөөтөҕүнэ тутатына бырааска көрдөрүнүҥ;
- хаан батааһына үрдүүр дьон күҥҥэ иккиттэн итэҕэһэ суох мээрэйдэниэхтээхтэр;
- дьиэ иһигэр салгыны сиигирдэр, ыраастыыр тэриллэри туһаныҥ, дьиэни инчэҕэй таҥаһынан элбэхтик сотон ыраастааҥ;
- чэпчэки таҥаһы кэтиҥ, сөрүүн дууска суунуҥ, күөмэйгитин уонна муннугутун мэлдьи сайҕааҥ;
- табаах тардыытыттан уонна арыгы иһиититтэн туттунуҥ.
Болҕойуҥ: Линзаны кэтэр дьон ураты сэрэхтээх буолуҥ. Буруо бытархай, харахха көстүбэт чаастара линзаҕа сыстан, харахха эчэйиини таһаарыахтарын сөп. Онон маннык туманнаах, буруолаах кэмигэр ачыкы кэтэр ордук.