Москва куоракка Арассыыйа Оборуонатын миниистирэ Андрей Белоусов биир дойдулаахпытыгар, Арассыыйа Дьоруойа Виктор Андреевич Софроновка «Кыһыл көмүс Сулус» мэтээли үөрүүлээх быһыыга-майгыга туттарда. Бу туһунан Саха Өрөспүүбүлүкэтин Ил Дархана Айсен Николаев бэйэтин социальнай ситимнэригэр иһитиннэрдэ.
Гвардия сержана Виктор Софронов үрдүк наҕарааданы байыаннай иэһигэр муҥура суох бэриниилээҕин, ураты хорсун быһыытын уонна үрдүк сатабылын иһин ылла. Кини 2022 сыл алтынньы ыйыттан анал байыаннай дьайыы зонатыгар байыаннай сорудахтары толорор. Саамай ыарахан усулуобуйаларга биир дойдулаахпыт бэйэтин хорсун буойун уонна дьиҥнээх идэтийбит байыаннай быһыытынан көрдөрдө. Кини хорсун уонна сытыы быһаарыныылара биһиги чаастарбыт туруоруллубут сорудахтары ситиһиилээхтик толороллоругар улахан көмөнү оҥороллор.
Ил Дархан Айсен Николаев Дьоруой төрөппүттэригэр туһаайан туспа махтал тылларын эттэ:
«Дьоруой төрөппүттэригэр — Галина Нагимовнаҕа уонна Андрей Викторовичка ураты махталбын тиэрдэбин. Уолгутун Ийэ дойдуга бэриниилээх, күүстээх санаалаах, хорсун гына иитэн таһаарбыккыт иһин барҕа махтал. Эһиги бүтүн Саха сирэ киэн туттар киһитин ииттигит. Виктор Андреевич, «Кыһыл көмүс Сулус» наҕарааданы ылбыккынан ис сүрэхпиттэн эҕэрдэлиибин! Саха сирэ киэн туттар!», — диэн өрөспүүбүлүкэ салайааччыта бэйэтин ханаалыгар суруйда.
Биир дойдулаахпытын үрдүк наҕараадатын ылбытынан итиитик-истиҥник эҕэрдэлиибит! Дойдубутугар кыайыылаах-хотуулаах, чэгиэн-чэбдик эргиллэн кэлэригэр баҕарабыт!