Бүгүн “Саха» көрдөрөр-иһитиннэрэр хампаанньаҕа ханаалын ситэриилээх былаас уорганын отчуотугар быһа эпииригэр өрөспүүбүлүкэ социальнай-экэнэмиичэскэй бэлиитикэтин билиҥҥи кэмин сүрүн хайысхаларын туһунан кэпсээтилэр.
СӨ Бырабыыталыстыбатын Бэрэссэдээтэлэ Кирилл Бычков сүрүн болҕомто байыаннай дьайыы кыттыылаахтарын уонна кинилэр дьиэ кэргэттэрин өйөөһүҥҥэ ууруллар диэтэ. Бу былаас уонна уопсастыба саамай суолталаах соругунан бэлиэтэннэ. Премьер кыайыы чугаһаабытыгар эрэнэрин биллэрдэ уонна байыастарга хорсун быһыыларын иһин махтанна.
«Байыаннай дьайыы кыттыылаахтарыгар уонна кинилэргэ ахсаабат көмөнү оҥорор биир дойдулаахтарбытыгар махтанабын. Эһиги оҥорор кылааккыт сүҥкэн. Дойдубут эһиги киллэрбит үтүө кылааккытын куруук өйдүүр, эһиэхэ махтанар буолуоҕа. Онон бу биһиги үлэбит сүрүн хайысхата. Мин эрэнэбин, биһиги кыайыыбыт чугас уонна бу кыайыыны ситиһэр туһугар судургута суох усулуобуйаҕа, түмсүүлээхпитин көрдөрдүбүт, билиҥҥи ыарахаттары эһигини кытта бииргэ туоруубут”, — диэтэ Кирилл Бычков.
Маны таһынан, билиҥҥи уустук балаһыанньаҕа норуот сомоҕолоһуута күүстээҕэ бэлиэтэннэ. Бу былаас уонна уопсастыба байыаннай сулууспалаахтар иннилэригэр үрдүк эппиэтинэһи сүгэрин көрдөрөр уонна дойду туруктаах буолуутун уонна сайдыыга дьулуһуутун бигэргэтэр.