СӨ тыатын хаһаайыстыбатын иһинэн үлэлиир кыра кыамталаах эбийиэктэри тутуу программата кэнники сылларга көдьүүстээҕин көрдөрдө.
Ол курдук Уус Алдан улууһун Баатаҕай бөһүөлэгэр «Биэттэ — Агро» хаһаайыстыба бэйэтин үүннэрэр бурдугуттан бородууксуйа оҥорон таһаараары бу бырагырааманан бэкээринэ дьиэтин тутта сылдьар. Үлэ хаамыытын уонна уопсай балаһыанньаны билсэ улуус баһылыга Василий Алексеев «Биэттэ — Агро» хаһаайыстыбаҕа сырытта.
Манна даҕатан эттэххэ, бу былааннарын өйөөн, олоххо киирэрин туһугар быйылгы сыл олунньутугар ыытыллыбыт улуустааҕы тыа хаһаайыстыбатын пуорумун кэмигэр, агроном идэлээх эдэр исписэлиис Василий Сивцев улуус баһылыгар үлэтин былаанын билиһиннэрбитэ, оҥорон таһаарыахтаах бородууксуйаларын аҕалан көрдөрбүтэ. Эдэр киһи кэскиллээх былааннааҕын сэҥээрэн, олоххо киирэрин туһугар улуус дьаһалтата көмө оҥорон, миэлиҥсэ ылан биэрбитэ. Ол миэлиҥсэлэрэ бу күннэргэ кэллэ. Онон хаһаайыстыба бары хайысханан толору үлэлииригэр кыах бэрилиннэ. Бу туһунан Уус Алдан улууһун дьаһалтатын пресс-сулууспата суруйар.
