Саха сирин бааһыналарыгар ыһыы үлэтэ түмүктэнэ илик. Бэс ыйын 25 күнүнээҕи туругунан, өрөспүүбүлүкэ үрдүнэн тыа хаһаайыстыбатын култуурата 42 930 гектар иэннээх сиргэ ыһыллан, былааннаммыт кээмэйтэн 82 бырыһыаныгар тиийдэ.
Бурдук ыһыытын үгүс хаһаайыстыбалар агрономическай болдьоҕу куоттарбакка, бэс ыйын 11 күнүгэр диэри бүтэрбиттэрэ. Отчуоттанар кэмҥэ бурдук 11 035 гектарга ыһылынна, ол былааннаммыт кээмэй 89 бырыһыаныгар тэҥ. Ити иһиттэн сэлиэһинэйэ – 1 187, ньэчимиэнэ – 2 105, эбиэһэ – 7 698, оруоһа – 45,3 гектардыы.
Сүөһү аһылыгар аналлаах култуура 24 972 гектарга ыһыллыбытыттан 11 922-тэбиир сыллаах итиэннэ 12 592-тэ ааспыт сыллардааҕы, 457-тэ быйылгы элбэх сыллаах окко киирэллэр. Билиҥҥитэ былаантан 77 бырыһыана туолан иһэр.
Хортуоппуй 5 759 гектар иэннээх бааһынаҕа олордуллан, былааннаммыт кээмэйтэн 89 бырыһыаныгар ыһыы үлэтэ түмүктэннэ. Хаппыыста 521, моркуоп 226, сүбүөкүлэ 187, олортон ураты 230 гектардыыга, барыта 1 164 гектарга буору булан, аһаҕас халлаан анныгар ыһыллар оҕуруот аһыгар былааннаммыт 85 бырыһыаҥҥатиийдэ.
Быйыл улуустар уонна хаһаайыстыбалар иннилэригэр тыа хаһаайыстыбатын култууратын ыһыы иэнин 52,6 тыһ. гектарга (ааспыт 2025 сылга 51,1 тыһ. гектар этэ) тириэрдэр сорук турар. Мантан бурдуга – 12,4 тыһ. гектар (былырыын 11,8 тыһ. гектар этэ), сүөһү аһылыгар аналлаах култуурата – 32,4 тыһ. гектар (31,6 тыһ. этэ), хортуоппуйа – 6,4 тыһ. гектар (6,3 тыһ. этэ), аһаҕас олордуллар оҕуруот аһа – 1,4 тыһ. гектар (1,3 тыһ. этэ).
Ол түмүгэр аны күһүн 14 тыһ. туонна бурдук, 76 тыһ. туонна хортуоппуй, 29,1 тыһ. туонна аһаҕас уонна бүрүөһүннээх олордуллар оҕуруот аһын үүнүүтэ хомуйуллуохтаах.
Ыһыыны таһынан 7,4 тыһ. гектар (былырыын 7,2 тыһ. гектар этэ) иэннээх сиргэ паардааһын үлэтэ ыытыллар. Инньэ гынан, быйыл саас-сайын холбоон 60 тыһ. гектар иэннээх бааһына сирэ оҥоһуллан, ааспыт сыллааҕы көрдөрүүнү (58,3 тыһ. гектар этэ) 3 бырыһыанынан куоһарыахтаах соруга турар. Ол туоларын-туолбатын этэргэ өссө даҕаны эрдэ.
Василий Никифоров
Хаартыска: «Хаҥалас хаһыат»
Өссө ааҕыҥ:
Үүтү тутуу былырыыҥҥытааҕар тэтимнээхтик баран иһэр
Сообщение Ыһыы үлэтэ түмүктэнэр түһүмэҕэр үктэннэ появились сначала на Улус Медиа.