Саха сиригэр быйыл 8 538 киһи сүрүн түһүмэххэ биир кэлим эксээмэни туттарар бэлиэтэниини ааспыт. Итинтэн 8 433 киһи – биир кэлим, 102 киһи – судаарыстыбаннай түмүктүүр эксээмэни туттарыахтара, өссө үс киһи ити икки эксэмээни иккиэннэрин талбыттар. Бу туһунан Үөрэх уонна билим министиэристибэтэ иһитиннэрэр.
СӨ үөрэх хаачыстыбатын кэтээн көрөр киин дириэктэрин солбуйааччы Таисия Иванова:
— Быйыл өрөспүүбүлүкэ үрдүнэн барыта 231 пуун үлэлиэҕэ. Бары ирдэнэр тэрилинэн хааччыллыбыттара. Бэс ыйын 1 күнүттэн үлэлэрин саҕалыахтара. Биһиги учуоттуур систиэмэбитигэр киирбитинэн, бу үөрэх дьылыгар оскуоланы 8 068 оҕо бүтэрэр.
Нуучча тыла уонна математика булгуччулаах биридимиэттэр буолаллар. Математика икки сүһүөхтээх: бастакыта – судургутук суоттааһын (базовай), иккиһэ – тэнитэн суоттааһын (профильнай). Математиканы тэнитэн суоттааһыны — 2651, физиканы – 1167, химияны – 1018, биологияны – 1409, информатиканы — 1222, обществознаниены – 2618 оҕо талбыта.
Бастакы биир кэлим эксээмэн бэс ыйын 1 күнүттэн устуоруйа, литэрэтиирэ, химия биридимиэттэриттэн саҕаланыаҕа.
Эксээмэн сүрүн түһүмэҕэ бэс ыйын 1-19 күннэригэр буолуохтара, салгыы бэс ыйын 22-25 күннэригэр эбии күннэри биллэрбиттэрэ. Уонна от ыйын 8, 9 күннэригэр дойду Бэрэсидьиэнин көҕүлээһининэн, эксээмэннэрин түмүктэрин тупсарыан баҕалаахтар биир биридимиэти талан туттарыахтарын сөп” – диэн быһаарда.
Ураты болҕомтону судаарыстыбаннай түмүктүүр аттестация ыытыллыытын хонтуруоллааһыҥҥа уураллар. Үлэ тэриллиитин СӨ бырабыыталыстыбатын иһинэн үлэлиир биэдэмистибэлэр икки ардыларынааҕы оробуочай хамыыһыйа сүрүннүүр. Эксээмэн ыытыллар кэмигэр туох эмэ ыксаллаах түгэн таҕыстаҕына суһал хамсаныыны хааччыйар анал ыстаап эмиэ үлэлиир.
Муус барыытынан сибээстээн, хас биирдии улууска биэдэмэстибэлэр икки ардыларынааҕы суһал бөлөхтөр тэриллибиттэрэ.