Быйыл Саха сиригэр сэттэ саҥа оскуоланы үлэҕэ киллэрэр былааннанар. Уопсайа 3 223 миэстэлээх үөрэх эбийиэктэрэ Дьокуускай куоракка, ону тэҥэ өрөспүүбүлүкэ хас да оройуонугар аһыллыахтара.
Оскуолалар Арассыыйа Бэрэсидьиэнэ Владимир Путин көҕүлээбит «Ыччат уонна оҕолор» уонна «Дьиэ кэргэн» национальнай бырайыактарын олоххо киллэрии чэрчитинэн, ону тэҥэ Саха Өрөспүүбүлүкэтин Ил Дархана Айсен Николаев биир кэлим үөрэх систиэмэтин сайыннарыы туһунан Стратегическай ыйааҕар сөп түбэһиннэрэн тутуллаллар.
Өрөспүүбүлүкэ киин куоратыгар 253 үөрэнээччигэ аналлаах 1-кы нүөмэрдээх оскуола, 180 миэстэлээх 4-с нүөмэрдээх анал (коррекционнай) уопсай үөрэхтээһин оскуолата уонна «Звезднай» түөлбэҕэ 990 миэстэлээх улахан оскуола үлэҕэ киириэхтэрэ. Саҥа үөрэх тэрилтэлэрэ Сунтаар уонна Нам сэлиэнньэлэригэр – хас биирдиилэрэ 450-нуу миэстэлээх, ону тэҥэ Өлүөхүмэ оройуонун Заречнай бөһүөлэгэр 60 миэстэлээх оскуолалар тутуллуохтара.
Инфраструктура сайдыыта 664 миэстэлээх эбии үөрэхтээһин икки эбийиэгин тэрийиинэн толоруллуоҕа. Дьокуускайга «Полярная звезда» диэн төгүрүк сыллааҕы оҕо сынньалаҥын уонна доруобуйатын чөлүгэр түһэрии киинэ, оттон Мииринэйгэ уруккута ситэ тутуллубатах куорпустарга тэриллнэн «Дворец детства» оҕо эбии үөрэхтээһинин киинэ аһыллара былааннанар. Маны таһынан, Дьокуускайга «Энергетик» оҕо лааҕырыгар 200 миэстэлээх түргэнник тутуллар түөрт куорпус үлэҕэ киириэҕэ. Салааны тиһиктээхтик саҥардыы хас да сыл устата салҕанар. 2020 сылтан өрөспүүбүлүкэҕэ 61 оскуола уонна 37 оҕо уһуйаана үлэҕэ киирдэ, сүүстэн тахса үөрэх эбийиэгэ, ол иһигэр Арктика оройуоннарыгар, хапытаалынайдык өрөмүөннэннэ. 14 тыһыынчаттан тахса оҕо аныгы уонна толору хааччыллыылаах усулуобуйаҕа үөрэнэр кыахтанна. Айсен Николаев Ил Түмэҥҥэ туһаайан этиитигэр бэлиэтээбитин курдук, бүтэһик биэс сылга үөрэх эбийиэктэрин тутуу тэтимэ урукку хас да уон сыл көрдөрүүтүн куоһарда. Саҥа национальнай бырайыактары уонна Уһук Илин сайдыытын бырагыраамаларын, ол иһигэр Дьокуускай уонна Нерюнгри маастар-былааннарын олоххо киллэрии социальнай инфраструктураны саҥардыы үрдүк тэтимин тутан хааларга уонна Саха сирин бары оҕолоругар хаачыстыбалаах үөрэх тиийимтиэ буолуутун хааччыйарга кыах биэриэҕэ. СӨ Ил Дарханын уонна Бырабыыталыстыбатын пресс-сулууспата.