Биллэрин курдук, муус устар 30 күнүгэр 2026 сыллааҕы декларация хампаанньата түмүктэммит. Бу тэрээһин тохсунньу 1 күнүттэн ыытыллыбыта. Декларация нолуок уорганыгар нолуогу төлүүр киһи учуокка турбут сиригэр ыйыллыбыт болдьоххо бэриллэр. Оттон декларациянан ааҕыллыбыт НДФЛ суумата от ыйын 15 күнүн аһарбакка эрэ төлөнүөхтээх.
Нолуок федеральнай сулууспатын Саха сиринээҕи салаата иһитиннэрбитинэн, нолуок уорганнарыгар киирбит чахчыларынан, бу сыл ыам ыйын 4 күнүнээҕи туругунан, 31 тыһ тахса киһи хамсаабат баайын-дуолун атыытыттан, бэлэхтээһинтэн уонна куортамыттан киирбит дохуотун ылыынан сибээстээн, 3-НДФЛ көрүҥүнэн декларация туттарыахтаах. Мантан 19 быр. декларацияларын туттарбыттар, 38 быр. быһаарыы биэрбит, оттон атыттар отчуотуу иликтэр.
Өскөтүн дьон 2025 сылга ылбыт дохуоттарын туһунан муус устар 30 күнүгэр диэри отчуоттаабатах буоллахтарына, от ыйын 15 күнүн кэнниттэн нолуок уоргана киниэхэ баар чахчыларга олоҕуран, НДФЛ сууматын ааҕыаҕа. Холобура, кыбартыыра атыылаатахха нолуок хамсаабат баай-дуол 70 быр. кадастровай сууматыттан ааҕыллыаҕа. Бу суума гражданин бигэргэммит ороскуотун сууматыгар вычеты туһанан бэйэтэ баҕа өттүнэн декларациялаабыт сууматынааҕар үрдүк буолуон сөп.
Декларациятын түһэриини уонна НДФЛ төлүүр болдьоҕун куоһардаҕына, нолуогу төлөөччүнү эппиэтинэскэ тардыахтарын сөбүн туһунан тустаах уорган иһитиннэрдэ.
Ол курдук, олохтоммут болдьоххо декларациятын киллэрбэтэҕинэ, уһаппыт ыйын ахсын нолуок төлөммөтөх сууматын 5 быр. кээмэйдээх ыстараап түһэр, ол эрээри 30 быр. куоһарбат уонна 1000 солк. итэҕэс буолбат. Нолуогун төлөөбөтөҕүнэ, төлөөбөтөх сууматыттан ыстараап 20 быр. тэҥнэһэр.
Ону тэҥэ 2026 сыл от ыйын 16 күнүттэн уһаппыт хас күнүн ахсын РФ Киин Баанын 1/300 тутаах ыстаапкатынан кээмэйдээх пеня ааҕыллар эбит.
Нолуок федеральнай сулууспатын Саха сиринээҕи салаата иһитиннэрбитинэн, 3-НДФЛ декларацияны толорон “Личный кабинет налогоплательщика для физических лиц” нөҥүө уонна “Налоги ФЛ” мобильнай сыһыарыынан ыытар табыгастаах диэн сүбэлиир.