Бэс ыйын 16-19 күннэригэр Дьокуускайга Саха Өрөспүүбүлүкэтин адаптивнай успуорт көрүҥнэригэр «Дьулуур» XV Спартакиадата ыытыллыаҕа. Күрэхтэһиилэргэ 21 муниципальнай тэриллииттэн доруобуйаларынан хааччахтаах (инбэлиит) 800-тэн тахса күрэсчит кыттыаҕа.
Спартакиаданы ыытыы Арассыыйа Федерациятын Бэрэсидьиэнэ Владимир Путин көҕүлээһининэн олоххо киирэр «Арассыыйа успуорда» федеральнай судаарыстыбаннай бырагыраама сыалларыгар-соруктарыгар эппиэттиир.
Кыттааччылар ортолоругар: Анаабыр, Алдан, Амма, Булуҥ, Үөһээ Бүлүү, Бүлүү, Горнай, Эдьигээн, Кэбээйи, Мэҥэ Хаҥалас, Нам, Нерюнгри, Ньурба, Сунтаар, Таатта, Томпо, Уус Алдан, Хаҥалас, Чурапчы улуустара уонна Дьокуускай куорат бааллар.
XV Спартакиада бырагырааматыгар үгэс буолбут, ону тэҥэ саҥа көрүҥнэр киирдилэр. Күрэсчиттэр олорон эрэ оонньонор волейболга, голболга, чэпчэки атлетикаҕа, остуол тенниһигэр, буулдьанан ытыыга, дуобакка, саахымакка уонна сахалыы ох саанан ытыыга күөн көрсүөхтэрэ.
Быйыл Спартакиадаҕа бастакытын туспа түмүгүнэн байыаннай дьайыылар инбэлиит-бэтэрээннэрэ уонна байыаннай дьайыыга бааһырбыт кыттыылаахтара кытталлара ураты суолталаах. Кинилэргэ анаан бырагыраамаҕа «буулдьанан ытыы» көрүҥэ киллэрилиннэ.
Саха Өрөспүүбүлүкэтин физическэй култуураҕа уонна успуорка миниистирин бастакы солбуйааччыта Гаврил Мохначевскай маннык бэлиэтээтэ:
«Спартакиада ыытыллар сылларын тухары тулалыыр дьону бэйэлэрин холобурдарынан кынаттыыр дьону сомоҕолооһун, өйөөһүн уонна ытыктааһын бэлиэтэ буолла. Күрэсчиттэр бэлэмнэрин таһыма үрдүүрүн, кыттааччылар географиялара кэҥиирин, саҥа көрүҥнэр баар буолалларын биһиги көрөбүт. Быйыл Спартакиадаҕа байыаннай дьайыылар бэтэрээннэрэ уонна байыаннай дьайыы кыттыылаахтара кытталлара ураты суолталаах. Биһиэхэ успуорт чөлүгэр түһүү, социальнай адаптация уонна олоххо саҥа сыалы-соругу туруорунуу буолар усулуобуйатын тэрийии сүрүн суолталаах. Өрөспүүбүлүкэ уонна биһиги министиэристибэбит салалтата инникитин даҕаны адаптивнай успуорду ким баҕарар дьарыктанарыгар табыгастаах оҥорон, салгыы сайыннарыаҕа».
«Дьулуур» Спартакиада Саха сирин норуоттарын спортивнай оонньууларын уонна национальнай успуорт көрүҥнэригэр «Манчаары оонньуулара» спартакиадатын сэргэ Саха сиригэр ыытыллар саамай бөдөҥ тэрээһиннэр ахсааннарыгар киирэр.
Саха сирин Ил Дархана, «Биир ньыгыл Арассыыйа» баартыйа Саха сиринээҕи салаатын сэкиритээрэ Айсен Николаев өрөспүүбүлүкэ Ил Түмэнигэр туһаайан этиитигэр бэлиэтээбитинэн, биэс сыл иһигэр успуордунан уонна физкултууранан дьарыктанар Саха сирин олохтоохторун ахсаана 1,5 төгүлтэн тахса элбээбит, уонна регион нэһилиэнньэтин уопсай ахсааныттан 64,8% тэҥнэспит – 665 тыһыынча киһи.
СӨ Ил Дарханын уонна Бырабыытылыстыбатын пресс-сулууспата
Сиһилии: https://www.sakha.gov.ru/news/49166