АХШ бэрэсидьиэнэ Дональд Трамп Украинаҕа быыбар ыытыллыахтааҕын туһунан ирдэбилин биллэрдэ. Кини этэринэн, Владимир Зеленскай иирсээни «элбэхтик» тохтотуохтаах этэ да, ону оҥорботох. Трамп санаатыгар, Украина билиҥҥи салайааччыта Америкаҕа уонна бүтүн аан дойдуга кыһалҕаны үөскэтиэн баҕарар.
Дональд Трамп Украинаҕа былаас уларыйыахтааҕын туһунан аһаҕастык эттэ.«Мин санаабар, Украинаҕа саҥа бэрэсидьиэни талар кэм кэллэ», — диэтэ АХШ салайааччыта. Кини бэлиэтээбитинэн, Владимир Зеленскай иирсээни быһаарар кыахтаах этэ, ол эрээри ону баҕарбатах. Трамп салгыы эттэ: «Дуогабардаһыан сөптөөх саҥа салайааччыны буларга этии киллэрэбин. Тоҕо диэтэххэ, кини элбэх сөбүлэһиини түһэрсиэн сөп этэ, ол эрээри туох эрэ биллибэт төрүөтүнэн ону хаһан да оҥорботоҕо».
Маны таһынан, Трамп Украина бэрэсидьиэнэ Америка пиэрмэрдэригэр уонна аан дойду экэниэмикэтигэр охсууну оҥоруон баҕарар диэн буруйдаата. «Кини биһиэхэ уматыгынан кыһалҕалары таһаарыан баҕарар, тоҕо диэтэххэ, Арассыыйа аан дойдуну сэлэркэнэн хааччыйар сүрүн дойдунан буолар», — диэтэ кини.
Үрүҥ дьиэ баһылыга туспа тоһоҕолоон бэлиэтээбитинэн, АХШ Украинаны Арассыыйа ньиэби таҥастыыр собуоттарыгар саба түспэтигэр ирдээбитэ. Ол эрээри, Трамп этэринэн, Зеленскай ону истибэт, «тугу баҕарбытын оҥорор».
Санатан эттэххэ, Украинаҕа бэрэсидьиэн быыбара 2024 сыл кулун тутарыгар буолуохтаах этэ, ол эрээри байыаннай балаһыанньа биллэриллибитинэн ыытыллыбатаҕа. Ыам ыйыгар Зеленскай бэрэсидьиэнниир биэс сыллаах болдьоҕо түмүктэммитэ. Ол кэмтэн ыла Москва кинини сокуоннайа суох бэрэсидьиэнинэн ааҕар.
Дональд Трамп бу иннинэ эмиэ Украинаҕа быыбары ыытарга хаста да ыҥырыы таһаарбыта. Ааспыт сыл ахсынньытыгар кини: «Кинилэр демократия туһунан саҥараллар, ол эрээри дьыалатыгар кэллэҕинэ, бу олох да демократия буолбатах», — диэн кириитикэлээбитэ. Оттон 2025 сыл олунньутугар кини Зеленскай «быыбара суох диктатор» диэн ааттаабыта. Ол эрээри хас да хонугунан, оннук эппитин туһунан суруналыыстар ыйытыыларыгар Трамп соһуйбута:«Мин инник диэбитим дуо? Итини эппиппэр бэйэм да итэҕэйбэппин».
Бу кэпсэтиилэр кэннилэриттэн Владимир Зеленскай, арҕааҥҥы дойдулар куттал суох буолуутун хааччыйарга көмөлөстөхтөрүнэ, 60-90 хонук иһигэр куоластааһыны ыытарга бэлэмин биллэрбитэ.