Чурапчы сириттэн төрүттээх бырааттыы Яковлевтар – снайпер Сергей уонна корректировщик Василий Ф.М. Охлопков аатынан IV Аан дойдутааҕы турнирга Саха сирин ааттаттылар, сүҥкэн ситиһиини оҥордулар.
Сергей уонна Василий Яковлевтар – Чурапчы улууһун Кытаанах нэһилиэгиттэн төрүттээхтэр. Сергей снайпер быһыытынан, Василий корректировщик-наводчик быһыытынан күрэхтэһиилэргэ кытталлар.
Яковлевтар «Күнүс» түһүмэххэ турнир бастакы күнүгэр 2300 м ытан рекорд олохтообуттара, онтон иккис күн 3000 м таба ытан сүҥкэн ситиһиилэннилэр. Бастакы ситиһиилээх күннэригэр Василий корректировщиктаабыт, Сергей ытааччы буоллахтарына, иккис күн Василий –ытааччы, Сергей – корректировщик буоллулар. Бу кырдьык, күрэхтэһии биир чаҕылхай түгэнинэн буолла.
Биир үөрүүлээҕэ уолаттар 3000 миэтэрэ тэйиччиттэн сыалы иккис ытыыларыттан таптылар – бу турнир уонна полигон устуоруйатыгар саҥа рекордунан буолар. Ил Дархан Айсен Николаев бу ситиһиини «Василий уонна Сергей, Саха сирин ааттатыахтарын ааттаттылар, биһиги эһигинэн киэн туттабыт!», — диэн эҕэрдэлээбитэ. Бу
Турнир түмүгүнэн I миэстэни ылбыттарын иһин Яковлевтарга Юрий Трутнев сорудаҕынан 250 грамм ыйааһыннаах кыһыл көмүс кутуу туттарылынна уонна анал бириистэринэн наҕараадаланнылар.
Яковлевтар бу бастакы кыайыылара буолбатах. Бу иннинэ кинилэр атын да күрэхтэргэ инники миэстэлэри ыла сылдьыбыттара.
2024 сыллаахха ыытыллыбыт бастакы турнирга уопсай түмүгүнэн Чурапчы чулуу уолаттара – снайпер Сергей Яковлев уонна корректировщик Василий Яковлев бастаабыттара. Кинилэргэ пикап массыына күлүүһэ туттарыллыбыта. Бу күрэххэ Сергей Яковлев 2000 м тэйиччиттэн сыалы таппыта. Ол эрээри -35 кыраадыстаах тымныыга, тыалга-кууска ытар туһугар ыарахаттардаах этэ.
Онтон 2025 сыл бэс ыйыгар Москва куоракка ыытыллыбыт бойобуой сайпинг турнирыгар эмиэ кылбар кыайыыны ситиспиттэрэ.
Сергей уонна Василий Яковлев 2024 сылтан турнир таһыма биллэрдик үрдээбит, ытааччылар маастарыстыбалара да тупсубут, саа сэбэ-сэбиргэлэ эмиэ сайдыбыт.
«Бастакы турниры кытары тэҥнээтэххэ, быйыл олус элбэх киһи кытынна, аан дойду таһымнанна. Бу олус кыра кэм иһигэр ытар тэрил – саа сэбэ-сэбиргэлэ сайынна. Сыалы табар комплекстар сайдыбыттар, калибрдар даҕаны улааппыттар. Быйылгы күрэхтэһиигэ Байанайбыт мүчүк гынна. 2500 м ытыыга тыала күүстээх этэ, онон уустуктардааҕа. Онтон иккис күн тыал уҥа өттүбүтүттэн үрэрэ, ону кыратык туора тутуохха эрэ наада этэ. Биһиэхэ Саха сирэ бүтүннүү көмөлөстө дии саныыбыт. Биһиги дьоммут-сэргэбит биһиэхэ итэҕэйэллэрин, күүс-көмө буолалларын сэрэйэбит. Икки аҥар сылы быһа бэлэмнэнэн бу кыайыыны ситистибит», — диэн Сергей кэпсиир.
«Күн-дьыл туруга интэриэһинэй буолла, эмиэ даҕаны күннээх сылаас, ол гынан баран күүстээх баҕайы тыаллаах. Бастакы күн тыал күүстээх уонна хайысхатын уларыта турар буолан, ыта үөрүйэх дьоҥҥо даҕаны ыарахан этэ. Убайым көмөтүнэн долгуйбакка, холкутук киирбиппит. Сайдыы барбыта тута харахха көстөр. Ытааччылар бары даҕаны күүстээхтэр, биир даҕаны түбэспиччэ ытыы суох. Барыта суот-учуот, бары даҕаны дьоһуннаах болҕомтону ууран кытыннылар. Биһиги дойдубутуттан кэлэн иһэн эбэ кытылыгар алаадьы ууран ааспыппыт, онтон ытыахпыт иннинэ үрдүбүтүнэн суор көтө сылдьара, ону ситиһии бэлиэтин курдук көрбүппүт уонна Байанайбыт мүчүк гынна диэн сэрэйбиппит», — диэн Василий үөрүүтүн үллэстэр.
Онтон Саха сиринээҕи снайпинг федерациятын бэрэссэдээтэлэ квалификацияны ааспатах элбэх киһи туораан хомойбутун, бу уустук сүүмэрдээһин буоларны быһаарда.
«Бастаан квалификацияны ааһыахха наада, 1 км 40 очукуону табыахха наада. Таптаххына эрэ салгыы күрэхтэһэҕин – бу саамай уустуга. Психологическай да, техническэй да өттүнэн олус ыарахан. Улахан аҥарбыт ааспатаҕа, ол аата бу ып-ыраах сиртэн күрэхтэһэ кэлбит дьон, 2 ытыыны эрэ оҥорон баран дойдуларыгар төннөллөр. Маннык ыраахтан кэлбит дьоҥҥо, биллэн турар, хомолтолоох, ол эрээри күрэхтэһии быраабылата оннук. Быйылгы күрэхтэһиигэ Саха сирэ өрөгөйдөөтө, чурапчыларбыт, бырааттыылар Яковлевтар, бэҕэһээ 3 км кыайыыны ситистилэр. Бу олус уустук дистанция, ким даҕаны маннык ырааҕы таба илигэ. 3203 миэтэрэни Крымҥа биирдэ таппыттара, онно олохтоох уолаттар этилэр. Оттон манна, уустук усулуобуйалаах килиимэттээх сиргэ 3 км киһи фигуратын табыы ураты ситиһии. Бу аан дойдуга снайпинг эйгэтигэр улахан сайдыы барбытын туоһулуур. Онон биһиги бэйэбит дьоммутунан, бу курдук психологическай, физическэй, техническэй өттүнэн күүскэ бэлэмнэнэн, маннык ырааҕы таппыттарынан киэн туттабыт. Икки аҥар сыл дьаныардаах дьарыктан, маннык ситиһии кэллэ», — диэн санаатын Александр Данилов санаатын үллэстэр.
Бу 2026 сыллааҕы турнирга 3000 миэтэрэҕэ икиис ытыыттан табыы – рекорду олохтооһун, кинилэр өр сыллаах дьаныардаах эрчиллиилэрин түмүгэ буолар. Турнирга уопсайа 187 ытааччы уонна 27 судьуйа – Саха сириттэн, Москваттан, Санкт-Петербуртан, Бурятияттан, Челябинскай, Белгородскай, Курскай уобаластартан, Хабаровскай уонна Забайкалье кыраайдарыттан, ону тэҥэ Беларусь Өрөспүүбүлүкэтиттэн кэлэн кытыннылар.
Онтон Яковлевтар бу ситиһиилэрэ Чурапчы улууһун уонна Саха сирин бэргэн ытааччыларын ааттарын ааттатта, бу Саха сиригэр номоххо киирбит Федор Охлопков курдук чулуу снайпердар үгэстэрин салҕааччылар баалларын көрдөрөр.