Алдан улууһун Аллараа Кураанах бөһүөлэгэр «Металлург» култуура уонна сынньалаҥ паарката үөрүүлээх быһыыга-майгыга аһылынна диэн Саха сирин Тутууга министиэристибэтэ иһитиннэрэр.
Паарканы тупсарыы үлэтэ икки түһүмэҕинэн ыытыллыбыт. Бастакыта — Арассыыйа Бэрэсидьиэнэ Владимир Путин көҕүлээбит «Толору хааччыллыылаах куорат эйгэтин тэрийии» федеральнай бырайыак чэрчитинэн, оттон иккиһэ — «Полюс Алдан» хампааньа үбүнэн өйөөһүнүнэн.
Саҥа сынньалаҥ сиригэр дьон-сэргэ туохха баҕарар дьарыктанарыгар бары усулуобуйа тэрилиннэ. Пааркаҕа бааллар:
- Трибуналаах сыана уонна дьаарбаҥка ыытар зона;
- Оҕо оонньуур былаһааккалара;
- Чуумпутук сынньанар муннуктар;
- Бэлэсипиэтинэн хатааһылыыр уонна сатыы дьаарбайар суоллар;
- Хаайыҥар суола уонна скандинавскай хаамыыга аналлаах маршруттар.
Бырайыак Саха сирин тымныы айылҕатын учуоттаан оҥоһуллубут, онон паарка төгүрүк сыл үлэлиэҕэ.
«Полюс Алдан» хампааньа салайар дириэктэрэ Евгений Малыхин тэрээһиҥҥэ бэлиэтээбитинэн:«Бу пааркаҕа сынньана сылдьан биири умнумаҥ: биһиги кыһыл көмүспүт сир анныгар эрэ буолбатах, саамай күндү баайбыт — ол эһиги, дьоммут-сэргэбит буолаҕыт». Бөһүөлэк баһылыга Александр Усенко этэринэн, бу көннөрү тупсарыы эрэ буолбатах, ити — олохтоохтор олохторун хаачыстыбатын уларытыы буолар. Билигин дьон бырааһынньыктыыр, оҕолорун кытта дьаарбайар, спордунан дьарыктанар уонна дьиэ кэргэнинэн сынньанар анал сирдэннилэр.
Икки оҕо ийэтэ, бөһүөлэк олохтооҕо Марина Петрова үөрүүтүн үллэһиннэ:
«Урут оҕолорбун кытта үчүгэй сиргэ күүлэйдээри куоракка айанныырбыт. Билигин барыта манна, аттыбытыгар баар. Паарка биһиги күннээҕи олохпут киинигэр кубулуйуоҕа». Инникитин тупсарыы үлэтэ үһүс түһүмэҕинэн салҕанан барара былааннанар.
Санатан эттэххэ, быйыл Саха сиригэр «Толору хааччыллыылаах куорат эйгэтин тэрийии» бырайыак чэрчитинэн 46 тупсарыы бырайыага олоххо киирэр. Олортон 13-һэ Бүтүн Арассыыйатааҕы куорат эйгэтин тупсарыыга бастыҥ бырайыактар куонкурустарын кыайыылаахтарынан буолбуттара.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.