Турция киин куоратыттан — Анкараттан олус үөрүүлээх сонун кэллэ! Түүр тыллаах норуоттар документальнай киинэлэрин XI бэстибээлигэр Саха сиринээҕи «Ыһыах» киинэ «Толору метражтаах документальнай киинэлэр» номинацияҕа кыайан, Гран-при үрдүкү бирииһин тутта.
Бу улахан бырайыагы биһиги талааннаах режиссердарбыт түмсэн уһулбуттара. Ол курдук, Семен Аманатов, Михаил Лукачевскай, Любовь Борисова, Сардана Барабанова уонна Радомир Томскай бииргэ үлэлээн, бүтүн түүр аан дойдутугар саха омук саамай улуу бырааһынньыга — Ыһыах кэрэтин уонна дириҥ, ытык ис хоһоонун тириэртилэр.
Саха Өрөспүүбүлүкэтин Култуураҕа уонна духуобунай сайдыыга миниистирэ Афанасий Ноев тус социальнай ситимигэр бу кыайыынан үөрүүтүн үллэһиннэ:
«Саха киинэтэ норуоттар икки ардыларынааҕы таһымҥа үрдүктүк биһирэммитэ — бүтүн өрөспүүбүлүкэбит туһугар улахан киэн туттуунан буолар. Тылынан уонна култууранан уратылаах да буолларбыт, биһиги киинэлэрбит атын дойду көрөөччүлэрин сүрэҕэр тиийэрэ ордук сыаналаах. Бу киинэни устубут бөлөҕү, Кинематографистар сойуустарын уонна өрөспүүбүлүкэбит бары олохтоохторун бу кыайыынан ис сүрэхпиттэн эҕэрдэлиибин!».
