Мессенджердэринэн «Туймаада-Нефть» уонна «СибОйл» сапыраапкаларыгар бэнсиин уонна сэлээркэ сыаната үрдүүрүн туһунан тарҕаммыт сурах сымыйа. Бу туһунан Саха сиринээҕи Суһал ыстаап официальнайдык биллэрдэ.
«СибОйл» хампааньа генеральнай дириэктэрэ Сергей Черных бэлиэтээбитинэн, сыана үрдүүрүн туһунан сонун — дьону буккуйаары таһаарыллыбыт сымыйа иһитиннэрии (фейк) буолар.
«Тэрилтэбит бигэтик, тэтимин түһэрбэккэ үлэлиир. Уматык саппааһа дэлэй, баар сыана уларыйбат, үрдээбэт», — диэн Черных иһитиннэрдэ.
Суһал ыстаап уонна уматыгынан хааччыйар хампааньалар салайааччылара суоппардары бэрэбиэркэлэммит, бигэргэтиллибит эрэ официальнай сонуннарга итэҕэйэллэригэр ыҥыраллар.