Саха сиригн улуустарыгар доруобуйа харыстабылын бастакы сүһүөх звенотун — биэлсэр-акушер пууннарын уонна амбулаториялары тутуу салҕанар.
Үлэ РФ Бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыагын, ону тэҥэ «Биир ньыгыл Арассыыйа» баартыйа норуодунай бырагырааматын «Здоровое будущее» бырайыагын сыалларыгар, соруктарыгар эппиэттиир.
Амбулаториялар Чурапчыга Кытаанахха, Аммаҕа 2-с Чакырга, Бүлүүгэ Тыымпыга, Уус Алдаҥҥа Бэйдиҥэҕэ, Сунтаарга Тойбохойго, Үөһээ Бүлүүгэ Боотулууга, Ньурбаҕа Чаппандаҕа, Намҥа Кириэс Кытылга, Хаҥаласка Хачыкаакка, Мэҥэ Хаҥаласка Табаҕаҕа, Тааттаҕа Томторго, ону сэргэ Марха микрооройуонугар тутуллаллар. Маны таһынан биэлсэр-акушер пууна Мииринэйгэ Таас Үрэххэ тутуллан киириэҕэ.
Былырыын мэдиссиинэ инфраструктуратын саҥардыыга улахан үлэ ыытылынна. Нам оройуонугар Маймаҕаҕа биэлсэр пууна, Намҥа Граф Биэрэгэр уонна Аллайыахаҕа Оленегорскайга биэлсэр-акушер пууннара, ону тэҥэ Усуйаанаҕа Казачье бөһүөлэгэр амбулатория үлэҕэ киирбиттэрэ.
—Биһиэхэ биэлсэр-акушер пууна киирэрин өр күүппүппүт. Онон саҥа дьиэлэнэн наһаа үөрбүппүт. Аны оҕолорбут, бэйэбит доруобуйабыт туһугар кэм уоскуйдубут. Саҥа дьиэ иһигэр киирдэххинэ ырааһа, үчүгэйэ сүрдээх. Барыта дьоҥҥо анаммыта биллэр. Көрдөрөргө туһунан хос, процедурнай, саҥа тэриллэр. Бу үтүө дьыалаҕа кыттыспыт дьоҥҥо барыларыгар махтанабын, — диэн Маймаҕа олохтооҕо, үлэ бэтэрээнэ, нэһилиэк Бочуотаах олохтооҕо Людмила Лебедева санаатын үллэстэр.
СӨ доруобуйа харыстабылын миниистирэ Лена Афанасьева бэлиэтээбитинэн, мэдиссиинэ саҥа эбийиэктэрин тутуу көмөтүнэн ыраах сытар нэһилиэктэр олохтоохторо миэстэтигэр хаачыстыбалаах көмөнү ылар кыахтаналлар. Национальнай бырайыактары олоххо киллэрии сылларыгар өрөспүүбүлүкэҕэ сүүсчэкэ биэлсэр-акушер пууннара уонна амбулаториялар тутуллан үлэҕэ киирбитэрэ бэлиэтэнэр.
Сиһилии: https://www.sakha.gov.ru/news/53274
СӨ Ил Дарханын уонна Бырабыыталыстыбатын пресс-сулууспата